Չեմ կարծում, որ այստեղ մենք խոսում ենք հանցանքի մասին, և հեռանալը պատասխանատվություն կրել չէ․ Նազելի Բաղդասարյանը՝ պատերազմից հետո Փաշինյանի հրաժարականի մասին. «Հրապարակ»

«Հրապարակ» թերթը գրում է.

«Իմքայլական պատգամավոր Նազելի Բաղդասարյանին Սուրեն Պապիկյանն առա­ջարկել է Շիրակի մարզպետի պաշտո­նը՝ օրերս այդ պաշտոնից ազատված Տիգրան Պետրոսյանի փոխարեն, սակայն նա հրաժարվել է: Կառավա­րության այսօրվա նիստում մարզ­պետ կնշանակվի առողջապահության նախկին փոխնախարար Հովհաննես Հարությունյանը:

«Վստահ եմ, որ անձը, ում անունը շրջանառվում է, կկարողանա ստանձնել այդ պարտավորությունը և այս դժվարին վի­ճակում կկարողանա մարզը ճիշտ ուղղությամբ տանել: Նա ունի կառա­վարման հմտություններ և, լինելով Շիրակի մարզից, լավ տիրապետում է այն խնդրակազմին, որն ունենք մարզում»,- ասաց Նազելի Բաղդա­սարյանը:

- Նախկին մարզպետն ինչո՞վ չարդարացրեց իրեն, որ ազատվեց պաշտոնից:

- Տեղյակ չեմ, և էթիկորեն ճիշտ չէ, որ ես մեկնաբանեմ:

- Իսկ ինչպե՞ս կբացատրեր հետպատերազմյան այս լարված շրջանում այսօրինակ փոխատե­ղումները՝ մեկին ազատում տանում են մեկ ուրիշ տեղ, մյուսին՝ մեկ այլ տեղ, ընդամենը գումարելիների տե­ղերն են փոխվում:

-Գիտե՞ք, քաղաքական գործընթացներ են, և որևէ մեկը հա­վերժ ու մշտական չէ, ինձ թվում է՝ այս փոփոխությունները պայմանավորված են նրանով, որ լավագույնս փորձում են յուրաքանչյուրի հմտություններն օգտագործել այն ոլորտում, որտեղ ինքն օգտակար կլինի:

-Իհարկե, դժվար է մեկնաբանել այն կադրային քաղաքականության տրամաբանությունը, որն իրականացվում է ձեր թիմի կողմից, բայց հանրության շրջանում արդեն հեգնանքի ու ծաղրի են արժանանում այս նշանակումները, հատկապես Արգիշտի Քյարամյանի ֆենոմենը, որն առանձին ուսումնասիրության ենթակա հարց է:

-Պարոն Քյարամյանի հետ անձնապես ծանոթ չեմ, չեմ կարող ասել, բայց, հավանաբար, ունի այնպիսի հմտություններ, որոնք իրավական ոլորտում իրավապահ համակարգում շատ կարևոր են:

-Ասում են՝ Նիկոլ Փաշինյանն ընդդիմությանը համագործակցություն է առաջարկել, ասելով, թե կառավարության ցանկացած անդամի կարող են փոխել, միայն ուժայինները իրեն թողնեն, որպեսզի թոթափվի լարվածությունը:

-Չեմ կարող մեկնաբանել, տեղյակ չեմ նման հայտարարությունից:

-Իսկ կա՞ նման մոտեցում ձեր թիմի կողմից, որ նման փոխատեղումներով լարվածությունը կմեղմվի երկրում:

-Բացառում եմ, որովհետև փոփոխությունները խիստ տարբեր մոտեցումներով են եղել: Տեսեք, օրինակ՝ փոխակերպումները, որոնք տեղի են ունեցել Պաշտպանության նախարարությունում, այլ տրամաբանությամբ են եղել, փոփոխությունները, որոնք միգուցե դեռ կլինեն ուժային կառույցներում, այլ տրամաբանություն կդրվի:

-Իսկ վարչապետի փոփոխություն ե՞րբ է լինելու:

-Ես կարծում եմ, որ մեր օրակարգում, քանի որ չկա հարց, վարչապետի փոփոխություն մոտ ապագայում դժվար է սպասել:

-Դուք կարծում եք, որ վարչապետը որևէ մեղք չունի՞ այս իրավիճակում, և ինքը չէ՞ թիվ մեկ պաշտոնյան, որ պետք է առաջինը հեռանար պատերազմից հետո:

-Ես կարծում եմ, որ ցանկացած պարագայում, երբ մարդ որևէ գործողության համար ստանձնում է պատասխանատվություն, պետք է այդ պատասխանատվությունը կրի: Վարչապետն այս պարագայում պատրաստ է այդ պատասխանատվությունը կրել:

-Դե թող կրի և հեռանա, ինչո՞ւ չի հեռանում, պատասխանատվություն կրելը պաշտոնին մնալո՞վ է:

-Ոչ, պատասխանատվություն կրելը հետևանքների համար պատասխանատվություն ստանձնելն է: Ես չեմ կարծում, որ հեռանալը պատասխանատվություն կրել է:

-Իսկ ո՞րն է պատասխանատվություն կրելը:

-Այն հետևանքները, որոնք առաջացել են, դրանց տալ արագ և համակողմանի լուծում և գտնել հենց հիմնավոր պատճառները, որոնք առիթ են հանդիսացել ստեղծված իրավիճակի, և, այո, եթե կլինեն իրավական գործընթացներ, եթե կլինեն պրոցեսներ, նաև այդ համատեքստում կրել:

-Դուք պատկերացնո՞ւմ եք, որ մեկը հանցանք գործի, որի հետևանքով մարդ մահանա, և ասի՝ ես պատրաստ եմ պատասխանատվություն կրել, բայց ազատության մեջ:

-Ես չեմ կարծում, որ այստեղ մենք խոսում ենք հանցանքի մասին՝ զուտ իրավական եղանակով, վստահ եմ, որ եթե խոսում եք պատերազմի և դրա հետևանքի մասին, կլինեն քննիչ հանձնաժողովներ, կլինի մեծ գործընթաց, որն արմատապես կքննի պատերազմի ծնած պատճառները, և այդ ինտերվալը չի լինի երկու տարի, կլինի 94 թվականից մինչ այսօր տեղի ունեցած բոլոր դեպքերն անխտիր՝ և՛ դիվանագիտական հարթակներում, և՛ պաշտպանության ոլորտում»,-գրում է թերթը:

Նյութն ամբողջությամբ կարդացեք թերթի այսօրվա համարում: