Թուրքիան աֆրիկյան երկրներում ազդեցությունն ամրապնդելու համար առևտրից, մարդասիրական օգնությունից զատ օգտագործում է նաև իր հեռուստասերիալները․ Financial Times

Թուրքիան մարդասիրական օգնության և հեռուստասերիալների միջոցով ձգտում է ազդեցություն հաստատել աֆրիկյան երկրների վրա, գրում է Financial Times պարբերականը։

Թուրքիան մայրցամաքում իր ազդեցությունն ամրապնդելու համար ապավինում է առևտրին, մարդասիրական օգնությանն ու նույնիսկ իր հեռուսերիալներին։

«Թուրքիան փափուկ ուժի առավելություններ ունի, որոնք կարող է օգտագործել»,- իսպանական Նավառայի համալսարանում թուրքական արտաքին քաղաքականության հարցերով փորձագետ Մայքլ Թանչումի խոսքը մեջբերում է Financial Times-ը։

2009 թվականից Թուրքիան կտրուկ ավելացրել է Աֆրիկայում դեսպանատների թիվը՝ 12-ից դարձնելով 42, իսկ Թուրքիայի նախագահ Ռեջեփ Թայիփ Էրդողանն այցելել է ավելի քան 20 մայրաքաղաքներ։

Էրդողանը ձգտում է առաջիկա տարիներին Աֆրիկայի հետ Թուրքիայի առևտրի ծավալը կրկնապատկել՝ հասցնելով մինչև 50 մլրդ դոլարի։ Ինչպես նշում է պարբերականը, Հյուսիսային Աֆրիկայում Թուրքիան նաև մասնակցել է ռազմական գործողությունների՝ աջակցություն ցուցաբերելով Լիբիայում ՄԱԿ-ի կողմից աջակցվող վարչակազմին։

Թուրքիան և նրա դաշնակից Կատարն Արաբական Միացյալ Էմիրությունների, Սաուդյան Արաբիայի և Եգիպտոսի դեմ պայքարում են տարածաշրջանում իշխանության հաստատելու համար, կարծում է թերթը՝ հիշեցնելով, որ Թուրքիան նաև խոշոր ռազմական ուսումնական ճամբար է ստեղծել Սոմալիում։