Համապետական սփռումից զրկվեցին բացառապես հակաիշխանական ԶԼՄ–ները, հիմա մարզային հանրության մոտ տպավորություն է ստեղծվելու, որ գտնվում ենք իդեալական երկրում և մրցակցում Շվեյցարիայի հետ․ Ռ․ Հայրապետյան

Վերջին մեկ տարվա ընթացքում մամուլի և խոսքի ազատության դեմ ճնշումներն աննախադեպ մասշտաբային բնույթ են կրում, այսօր լրագրողների հետ հանդիպման ժամանակ ասաց իրավաբան Ռոբերտ Հայրապետյանը՝ անդրադառնալով Հեռուստատեսության և ռադիոյի հանձնաժողովի որոշմանը, ըստ որի՝ որոշ հեռուստաընկերությունները զրկվեցին հանրապետական և մայրաքաղաքային սփռման հնարավորությունից:

«2020 թվականին պետությունը գտնվել է հատուկ ռեժիմի մեջ՝ սկզբում արտակարգ դրության իրավական ռեժիմ, որին հաջորդեց ռազմական դրությունը, որի դեպքում Կառավարության որոշումների ուղղակի անմիջական շեշտադրումները դրված էին ԶԼՄ-ների խոսքի ազատության սահմանափակման վերաբերյալ: Ռազմական դրության ժամանակ լրատվամիջոցների ազատությունը տոտալ սահմանափակվեց և արգելվեցին նաև ֆեյսբուքյան օգտատերերի գրառումները, և եթե այս կամ այն չափով բացահայտվում էր որևէ ճշմարտություն և կարող էր Կառավարության քիմքին հաճո չլիներ, նրանք հրավիրվում էին ոստիկանություն և պահանջվում էր, որ հեռացվեն գրառումները, ինչպես նաև ահռելի վարչական տույժեր ու տուգանքներ էին կիրառվում լրատվամիջոցների նկատմամբ»,- նշեց նա:

Անդրադառնալով ՀՌՀ որոշմանը, ըստ որի «5-րդ ալիք»-ը չստացավ հանրապետական սփռում, նա նշեց, որ երկու տարի «5րդ ալիք»-ի նկատմամբ եղել են ճնշումներ: Նրա խոսքով՝ 2020 թվականին դեպքեր են եղել, երբ 4 ոստիկան մտել է հեռուստաալիք, տաղավարում դիմակ չկրելու համար կազմել վարչական ակտ: Ինչպես նաև իշխանական պատգամավորների կողմից եղել է ակնհայտ հակաօրինական վարքագիծ «5-րդ ալիք»-ի լրագրողների նկատմամբ, որի գործով հայցը դատարանն ընդունել է վարույթ:

Խոսելով «Արմնյուզ» հեռուստաընկերության մասին, որը ՀՌՀ որոշմամբ ևս հանրապետական սփռման հնարավորությունից զրկվեց, Ռոբերտ Հայրապետյանը նշեց, որ հեռուստաընկերությունը մի քանի միջադեպով ենթարկվել է «հետապնդման»։

««Հայելու առաջ» Հաղորդման ժամանակ ընդդիմադիր ներկայացուցիչներ օբյեկտիվորեն քննադատում էին իշխանությանը, և Հեռուստատեսության և ռադիոյի հանձնաժողովի հատուկ որոշմամբ սահմանափակեց այդ հաղորդաշարի եթեր հեռարձակումը, որից հետո Աբրահամ Գասպարյանի հաղորդումներից մեկի կապակցությամբ ոստիկանության թվով 5 աշխատակից ներկայացել էին «Արմնյուզ» հեռուստաընկերություն, ներխուժել տնօրեններից մեկի աշխատասենյակ և հիմնավորումներ են բերվել, որ տաղավարում դիմակ չեն կրել, որն ակնհայտ արհեստածին գործողություն էր՝ նպատակ ունենալով «վախեցնել» լրատվամիջոցին: Հետագայում ոստիկանությունը չկարողացավ հիմնավորել, որ Աբրահամ Գասպարյանի դիմակ չկրելը պետք է առաջացներ վարչական պատասխանատվություն և այդպես էլ ակտ չկայացվեց»:

Ռոբերտ Հայրապետյանը, խոսելով «Հ2» հեռուստաընկերության մասին, որը զրկվեց ոչ միայն հանրապետական, այլև մայրաքաղաքային հեռարձակումից, նշեց, որ լրատվամիջոցի գործունեության դադարեցումը պետք է ունենա հիմնավորումներ, սակայն նման հիմնավորումներ դեռևս չեն ներկայացվել:

«Ակնհայտ է, որ բացառապես հակաիշխանական լրատվամիջոցները զրկվեցին համապետական սփռումից, որովհետև պարզ է, որ մարզերում ժողովրդի իրազեկվածության մակարդակը կախված է հեռուստաընկերությունների կողմից տրամադրվող նյութերից, և եթե բոլոր մարզերում հեռարձակվեն միայն «Առաջին ալիք»-ի լուրերը, ապա ակնհայտ է, որ մարզային հանրության մոտ տպավորություն է ստեղծվելու, որ մենք գտնվում ենք իդեալական երկրում և մեր երկիրը տնտեսությամբ մրցակցում է Շվեյցարիայի հետ: Իշխանության կողմից ծրագրված հերթական տեղեկատվական մոլորեցնող, մանիպուլատիվ գործողությունները ծրագրված գնում են այս հարթության մեջ»,– ասաց նա:

Ռոբերտ Հայրապետյանը նշեց նաև, որ արտակարգ դրության պայմաններում իշխանության կողմից «հետապնդվել» են նաև օնլայն հարթակում գործող լրատվամիջոցները, օրինակ՝ «168 ժամ» կայքի դեպքում կայացվել է թվով 14 վարչական ակտ, որից ամեն մեկի նվազագույն գումարը կազմել է 700 հազար դրամ: