«Վայրկյաններն էի հաշվում, թե երբ էր վերադառնալու». Էլեն Ազնավուրյանը` Ամանորի գիշերն անակնկալ նշանադրության, սիրելիի՝ ռազմաճակատ մեկնելու ու դժվար օրերի մասին (ֆոտո)

Դերասանուհի Էլեն Ազնավուրյանի կյանքում 2021-ը նշանավորվեց առաջին իսկ րոպեներից: Հենց Ամանորի գիշերը նրա ընտրյալը` Բորիս Մկրտչյանը, նրան նշանադրության առաջարկություն արեց Սուրբ Մարիամ Աստվածածին եկեղեցում: NEWS.am STYLE-ի հետ զրույցում Էլենը խոստովանել է` նախապես ոչինչ չէր կասկածել, իսկ սիրելիի ռոմանտիկ քայլը վերադարձրել է դերասանուհու լավատեսությունը նոր տարվա նկատմամբ:

Մեզ հետ զրույցում Էլենը ոչ միայն անկեղծորեն կիսվել է իր ամանորյա անակնկալի հույզերով, այլեւ վերհիշել նախորդ տարվա ամենածանր ամիսները, երբ ստիպված է եղել սպասել ռազմաճակատ մեկնած սիրելիին:

«Այս տարին այնպես է սկսվել, որ համոզված եմ` վատը լինել չի կարող»,-ասում է ոգեւորված դերասանուհին,-«Այս Ամանորը որոշել էինք դիմավորել եկեղեցում, պատարագի էինք մասնակցում, իսկ վերջում, երբ դեռ բոլորը ներկա էին` մոտ 300 անձ, Տեր Զաքարիա քահանա Ավետիսյանը մեր անունները հնչեցրեց ու կանչեց իր մոտ: Կարծեցի` ուզում էր օրհնել մեզ, նույնիսկ, երբ հարցրեց` «Պատրա՞ստ ես այս երիտասարդի կինը դառնալ», ես դեռ չէի հասկանում` ինչ էր կատարվում: Պատասխանեցի` «այո», իսկ երբ ընկերս հանեց մատանին, խառնվեցի իրար, ինձ թվաց` ամուսնանում ենք ու ձախ ձեռքս մեկնեցի (ծիծաղում է): Հետո Տեր Զաքարիան նշանադրության արարողություն անցկացրեց»,-վերհիշել է է նա` զարմանալով, թե ինչպես չէր կռահել սիրելիի մտադրությունը:

«Նախօրոք ամեն ինչ ծրագրված էր, բոլորը գիտեին, բացի ինձանից: Սա լավագույն տարեսկիզբն էր, որ կարող էր լինել: Մտքովս անգամ չէր անցել, որ հենց այդ օրը նման բան կարող էր պատահել: Գիտեի, որ պիտի խոսեինք, նշանադրության օրը որոշեինք... Բայց նույնիսկ մայրիկս, որ ցանկացած բան ինձ, սովորաբար, նախապես հուշում է, այս անգամ ոչինչ չէր ասել, ընդհանրապես գլխի չէի ընկել»:

Էլենը վերհիշեց նաեւ պատերազմի շրջանը ու դրա պատճառով բաժանումը.

«Նախորդ տարին շատ դժվար ու վատ հիշողություններով լի էր, հատկապես` վերջին երեք ամիսը... Երկուսս էլ վայրկյաններն էինք հաշվում, թե երբ էր ամեն ինչ ավարտվելու, թե երբ էր նա վերադառնալու ռազմաճակատից... Չեմ կարող ամեն ինչ նկարագրել, իրոք շատ բարդ շրջան էր, իսկ ամենավատ օրն այն էր, երբ իմացանք, որ նա ու իր ընկերները շրջափակման մեջ էին հայտնվել եւ վայրկյանների հարց էր` կփրկվեի՞ն, թե ոչ... Այդ օրերին լինում էի Կամերային թատրոնում, որտեղ շատ մեծ կամավորական խմբով օգնում էինք Արցախից ընտանիքներին ու զինվորներին. փորձում էի գործով ինձ մի քիչ շեղել, ու փառք Աստծո, որ նա ողջ-առողջ վերադարձավ եւ մեր նպատակի մի մասն իրականացրինք»,-ասում է դերասաուհն,-«2020-ի ամեն ամսում մի վատ բան եղել է, բայց 2021-ն արդեն լավ ենք սկսել` հենց Աստծո տանը: Մեծ հույս ունեմ, որ Աստծո օրհնությունն աբողջ տարի մեզ հետ կլինի եւ ամեն ինչ հաջող կանցնի: Աստված բոլորիս հետ, խաղաղություն մեր ազգին»: