Բայդենը հայտարարել է, որ պատվաստանյութի արտադրությունն արագացնելու համար կգործարկի ռազմական դրության օրենքը

ԱՄՆ նորընտիր նախագահ դեմոկրատ Ջոզեֆ Բայդենը հաստատել է, որ երդմնակալությունից հետո կգործարկի ռազմական դրության օրենքը երկրում կորոնավիրուսի դեմ պատվաստանյութի արագ տարածման համար: Նա համապատասխան հայտարարությունը կատարել է Ուիլմինգթոնում (Դելավեր նահանգ) ելույթ ունենալիս, փոխանցում է ՏԱՍՍ-ը:

«[Պատվաստանյութի տարածման գործընթացն] արագացնելու համար պաշտոնը ստանձնելուց հետո ես կգործարկեմ ռազմական դրության օրենքը,- նշել է դեմոկրատը, որի երդմնակալությունը նախատեսված է 2021 թվականի հունվարի 20-ին: - Ես կկարգադրեմ, որ մասնավոր ընկերությունները արագացնեն պատվաստանյութերի ստեղծման համար անհրաժեշտ նյութերի, ինչպես նաեւ պաշտպանական սարքավորումների արտադրությունը»:

Հիշատակված օրենքը նախագահին թույլ է տալիս ազգային անվտանգության ամրապնդման նպատակով մեծացնել որոշակի ապրանքների արտադրության ծավալները: Պետության գործող ղեկավար Դոնալդ Թրամփը համավարակի սկզբում այդ փաստաթղթի դրույթները գործարկել էր մի քանի տասնյակ անգամ:

Թրամփի վարչակազմը կորոնավիրուսի դեմ պատվաստանյութը երկրում տարածում է զգալիորեն ավելի դանդաղ, քան ավելի վաղ նախատեսված էր, հայտարարել է Բայդենը: «Պատվաստանյութի բաշխման Թրամփի ծրագրի կատարումը ձգձգվում է»,- ասել է նա: «Ինչպես վաղուց նախազգուշացրել եմ, պատվաստանյութի տարածման եւ ներարկման միջոցառումներն իրականացվում են ոչ այնպես, ինչպես անհրաժեշտ է»,- շեշտել է նա:

«Թրամփի վարչակազմը մի քանի շաբաթ առաջ հասկացրեց, որ 20 մլն ամերիկացիներ կարող են պատվաստվել դեկտեմբերի վերջին: Մինչ դեկտեմբերի վերջ մի քանի օր է մնացել, բայց պատվաստվել են միայն մի քանի միլիոն մարդիկ»,- պարզաբանել է Բայդենը: Նրա կարծիքով՝ եթե նշված ծրագիրը հետագայում եւս նույնքան դանդաղ կատարվի, ապա ԱՄՆ բնակչության պատվաստման համար «տարիներ կպահանջվեն»: Դեմոկրատի կարծիքով՝ ԱՄՆ-ում կորոնավիրուսի տարածման հետ կապված իրավիճակը, ամենայն հավանականությամբ, կբարելավվի միայն մարտին: