«Թուրքական բանակի ոտքերն աղտոտում են մեր մաքուր երկիրը». գեներալ Հաֆթարը Թուրքիային Լիբիայից հեռանալու երկու տարբերակ է առաջարկել

Թուրքիան երկու ճանապարհ ունի Լիբիայից դուրս գալու, հայտնում է almasdarnews.com լրատվական կայքը՝ հղում տալով Լիբիայի ազգային բանակի հրամանատարի խոսքերին:

Լիբիայի ազգային բանակի հրամանատար, ֆելդմարշալ Խալիֆա Հաֆթարը վերջնագիր է ներկայացրել Թուրքիային, Լիբիայից խաղաղ հեռանալու կամ պատերազմն ընտրելու հարցում՝ հաշվի առնելով, որ երկու կողմերից էլ որոշիչ առճակատումներ են սկսել:

Հաֆթարը, հինգշաբթի օրը Լիբիայի անկախության 69-րդ տարեդարձի կապակցությամբ, Լիբիայի ազգային բանակի գլխավոր հրամանատարության կողմից Բենղազի քաղաքում կազմակերպված արարողության ժամանակ ասել է. «Անկախությունը ոչ մի արժեք չունի, ազատությունը ոչ մի նշանակություն չունի, չկա անվտանգություն, չկա խաղաղություն, և թուրքական բանակի ոտքերն աղտոտում են մեր մաքուր երկիրը: Թշնամու համար այլընտրանք չկա: Զավթիչը կարող է հեռանալ միայն խաղաղ ու կամավոր կերպով, կամ զենքի ուժով և ուժի կամքով»:

Հավելելով նա շեշտել է, որ Թուրքիայի գաղութային պատրանքների դարաշրջանն ավարտված է, և որ Թուրքիան պետք է ընտրի՝ կա՛մ հեռանալ, կա՛մ պատերազմել:

Հաֆթարը շեշտել է, որ «Թուրքիան և նրա վարձկանները շարունակում են զորագրվել պատերազմի համար՝ պատերազմ, որտեղ առաջին գնդակի արձակումից պետք է անպայման պատրաստ լինեն մահվան»: