Թրամփի խորհրդականները մտահոգված են, որ նա գրեթե «չի կառավարում» երկիրն ու առավելապես կենտրոնացած է Բայդենի հաղթանակի վիճարկման ուղղությամբ. The New York Times

ԱՄՆ գործող նախագահ Դոնալդ Թրամփի խորհրդականները մտահոգված են, որ նա գրեթե ամբողջ ուշադրությունը կենտրոնացնում է ոչ թե պետական գործերի, այլ նախագահական ընտրությունները չեղյալ հայտարարելու ծրագրեր մշակելու վրա, որոնցում հաղթանակ է տարել ԱՄՆ նորընտիր նախագահ Ջո Բայդենը: Այս մասին ասվում է The New York Times-ում հրապարակված հոդվածում:

Նրա խոսքով ՝ Թրամփը «գրեթե ամբողջությամբ ետ է կանգնել երկիրը ղեկավարելուց՝ չնայած այն հանգամանքին, որ կորոնավիրուսը ռեկորդային արագությամբ է տարածվում ամերիկացիների շրջանում»: Բացի այդ, նա «գրեթե ոչ մի դեր չի խաղացել բանակցությունների ընթացքում խրախուսման միջոցների օրինագծի առնչությամբ»:

Հրապարակման համաձայն՝ այս տեղեկատվությունը ստացվել է «վարչակազմի տասնյակ ներկա և նախկին աշխատակիցներից, հանրապետականներից, նախագահի դաշնակիցներից»:

Ըստ այդ տվյալների ՝ «նրա անկանոն պահվածքը, իր պարտականությունների նկատմամբ անվճռականության դրսևորումն անհանգստություն է առաջացնում նույնիսկ ամենահավատարիմ խորհրդականների մոտ»:

Ինչպես նշված է հոդվածում՝ «Թրամփի խորհրդականների մեծ մասն այն կարծիքին է, որ գործող նախագահը կհեռանա Սպիտակ տնից մինչ հունվարի 20-ը»:

Ըստ թերթի՝ «դժվար է հասկանալ, թե որքանով է Թրամփը փորձելու տապալել ընտրությունների արդյունքները, արդյո՞ք նա կհրաժարվի լքել Սպիտակ տունը, թե՞ վերջին շաբաթներին մի շարք միակողմանի որոշումներ կկայացնի քաղաքական ոլորտում»:

«Գործող խորհրդականները պատմել են այն մասին, թե ինչպես են ամեն օր փորձեր արվում Թրամփին զերծ պահել իմպուլսիվ գործողություններից և այն մարդկանց չլսելուց, որոնք ասում են նրան այն, ինչ ինքն ուզում է լսել», - ասվում է նյութում:

Ամերիկացի առաջնորդը, իբր, «լսում է հանրապետականներին, որոնք պնդում են, որ փոխնախագահ Մայքլ Փենսը կարող է օգնել ընտրությունների վրա ազդելու գործում ՝ հաջորդ ամսվա քվեարկությունը վավերացնելու սովորական ընթացակարգով, սակայն իրականում դա հնարավոր չէ»:

Ըստ թերթի՝ Թրամփը «բողոքել է դաշնակիցներից, որ Փենսը ... պետք է ավելի ակտիվ կերպով իրեն պաշտպաներ»: Նա նաև զայրացած է, որ Սենատում հանրապետականների մեծամասնության ղեկավար Միթչ Մաքքոնելը խոստովանել է Բայդենի հաղթանակը ընտրություններում», - ասվում է զեկույցում:

ԱՄՆ ընտրությունների արդյունքները

ԱՄՆ նախագահական ընտրություններն անցկացվել են նոյեմբերի 3-ին: Դեկտեմբերի 14-ին ընտրիչների կոլեգիան հաստատեց քվեարկության արդյունքները, ըստ որի ՝ դեմոկրատ Ջո Բայդենը կդառնա պետության նոր ղեկավար: Թրամփը չի ընդունում պարտությունը և դիմում է դատարաններ մի շարք նահանգներում ընտրողների վերահաշվարկի պահանջով: Այնուամենայնիվ, Սպիտակ տան ղեկավարի փաստաբանների գործողությունները հաջողությւնների չեն հասել. նրանց հայցերը մերժվել են դատարանների, այդ թվում ՝ ԱՄՆ Գերագույն դատարանի կողմից:

ԱՄՆ նորընտիր նախագահ Ջո Բայդենի երդմնակալության արարողությունը տեղի կունենա հունվարի 20-ին: