Եղունգների ձևն ու բնավորությունը
Մարդու անատոմիական առանձնահատկություններից է նաև եղունգների ձևը, ըստ որի, հոգեբանները փորձել են տալ նրանց բնավորության առանձնահատկությունները:
Սրածայր կամ կոնաձև եղունգները վկայում են գեղանկարչության, ճարտարապետության, կառուցողականության և կերպարվեստի այլ ճյուղերի նկատմամբ իրենց տիրոջ հակման մասին: Նա արտիստիկ բնույթ ունի, բնածին ռոմանտիկ է, երևակայող, իրականությունը փոքր-ինչ գունազարդելու սովորություն ունի, հետևաբար, նաև լավատես է, աշխարհին նայում է վարդագույն ակնոցով: Նա շատ դյուրին կարող է տարվել գործով, որևէ մարդով կամ գաղափարով, բայց նույն դյուրինությամբ էլ սառում է ու սկսում զբաղվել նոր, ավելի հետաքրքիր բանով, հատկապես, եթե նրա նախորդ զբաղմունքը աշխատասիրություն ու նպատակասլացություն էր պահանջում: Այլ խոսքով՝ նման մարդուն գրավում է այն, «ինչն ինքն իրեն ստացվում է» ու չի պահանջում համառություն, ջանասիրություն, համբերություն: Ոգեշնչման կարճատև պահն անցնելուն պես անհետանում է նաև նրա հետաքրքրությունը սկսած գործի հանդեպ: Նրան բնորոշ է ևս մի հատկություն' անկախությունը ինչպես անձնական, այնպես էլ հասարակական փոխհարաբերություններում:
Կոնաձև եղունգներ ունեցող մարդու համար ցանկացած ժամանակային սահմանափակումները, ուրիշի պլանին ենթարկվելու անհրաժեշտությունը նշանակում են միայն մի բան' «դա ինձ համար չէ»: Անձնական սահմանները խախտելու կամ սեփական կանոններով նրան առաջնորդելու փորձը նույնիսկ սիրելի անձնավորության կողմից հանգեցնում է միևնույն արդյունքին: Նման մարդիկ կարողանում են ներթափանցել իրերի, երևույթների ու իրադարձությունների, շատերի համար անհայտ, թաքնված իմաստների մեջ: Դա է պատճառը, որ նրանք հաճախ լրջորեն տարվում են էզոթերիկ գիտություններով, կրոնով, մագիայով և այլն: Նյութական բարիքների հանդեպ նրանք միանգամայն անտարբեր են: Դա, բնականաբար, ասկետիզմ չէ, պարզապես այդ բարիքները նրանց կողմից ընկալվում են ավելի շուտ որպես բնական, ի սկզբանե տրված, այլ ոչ թե որպես կյանքի նպատակ:
Բահանման եղունգները վկայում են, որ իրենց տիրոջ մոտ նախևառաջ բանականությունն ու տրամաբանությունն են, հետո նոր զգացմունքները: Նման մարդը մատերիալիստ է, գերադասում է կյանքի վերաբերյալ պրակտիկ գիտելիքները բոլոր ինտուիտիվ ենթադրություններից: Ինֆորմացիայի հիմնական աղբյուրը նրա համար անձնական փորձն է, թեկուզև' բացասական: Նրա հետ անիմաստ է խոսել հույզերի լեզվով: Եթե ցանկանում եք նրան համոզել ինչ-որ հարցում, ավելի լավ է ասեք.«Ես գիտեմ» ու բերեք կոնկրետ օրինակներ: Բահանման եղունգներ ունեցող մարդը կարող է հիանալի արհեստավոր լինել՝ բառի լայն իմաստով: Ստեղծագործական պոռթկումները, ինտուիտիվ արարքները, անորոշությունն ու անկանխատեսելիությունը նրա համար չեն: Փոխարենը, ցանկացած գործ, որ նա կնախաձեռնի, կկատարի ամենայն ճշգրտությամբ, գրեթե կատարելապես:
Քառանկյուն եղունգները վկայում են փիլիսոփայական խոհամտության մասին, ընդ որում, ոչ միայն արվեստի, գրականության, այլև հումանիտար և ճշգրիտ գիտությունների ոլորտում: Կարևորն այն է, որ նա ամեն ինչում տեսնում է հստակ և օրինաչափ տրամաբանական կապը: Եղունգների նման ձևը կարող է վկայել նաև, որ իր տերն իշխանատենչ է, կարող է առաջնորդ լինել, վեր բարձրանալ ամբոխից, ծայրահեղ իրավիճակներում առաջինը կայացնել ճիշտ որոշումը: Նրա թույլ կողմը սեփական ներաշխարհն է:
Քառակուսի եղունգներ ունեցող մարդը պարզապես մոլորվում է, երբ հարկ է լինում հետևել սեփական զգացմունքների, բարդույթների, արարքների դրդապատճառների ընթացքին: Միևնույն ժամանակ, նա հիանալի կերպով կարող է հասկանալ դիմացինին, առանց սխալվելու: Սակայն, ամեն անգամ, երբ խոսքը նրա անձի մասին է լինում, նրա անսխալական ու սառը դատողությունը խաթարվում է: Նման մարդու հետ շփվելիս' ապարդյուն է անդրադառնալ նրա հույզերին և ինտուիցիային, քանզի դրանք նրա համար օտար ու անհասկանալի ոլորտներ են: Անիմաստ է նրա հետ խոսել նաև սեփական զգացմունքների մասին. այս դեպքում ևս նա ձեզ չի հասկանա: Նա ընկալում է միմիայն փաստերի լեզուն՝ կոնկրետ փորձն ու տրամաբանական կապերը:
Կլոր եղունգները վկայում են, որ իրենց տերը խոցելի է, շուտ վիրավորվող, սիրում է երազել, ընդ որում, այնպիսի բաներ, որոնք գրեթե անիրագործելի են, ի վիճակի չէ համակերպվել անարդարության հետ, նույնիսկ, եթե դա իրեն չի վերաբերում, անուղղելի սենտիմենտալ է, ոչ միշտ է օբյեկտիվ գնահատականներում: Ցավոք, նա չի տիրապետում ՙիրեն ներկայացնելու՚ արվեստին ու չնայած բոլոր հնարավորություններին, հաճախ հանդես է գալիս իր համար ոչ այնքան նպաստավոր լույսի տակ: Հաճախ նա զգում է իր թուլությունը, ոչ միշտ է կարողանում դուրս գալ ստեղծված իրավիճակից, կարող է երկար տանջվել չգործած մեղքի անհասկանալի բարդույթից: Եվ, չնայած ներաշխարհի բոլոր այս առանձնահատկություններին, նա ունակ է իրապես երջանկացնել այն մարդուն, ով կկարողանա գնահատել իր բարությունն ու մաքուր հոգին:
Վարդագույն եղունգները վկայում են կայունության ու հաստատակամության մասին:
Անհավասար, ծռմռված եղունգները կամակորության ու կռվարար բնավորություն ունենալու նշան են:
Կեռ և սրացված եղունգները, հատկապես' նիհար ձեռքերի վրա, մատնանշում են մարդու խիստ ու չար բնույթը: Հնարավոր է, որ նման մարդը թոքերի հիվանդություն ունենա:
Գունատ եղունգները, հատկապես եթե դրանք նաև կլոր են, վկայում են այն մասին, որ իրենց տերը վտանգավոր մարդ է բոլոր ասպարեզներում:
Ընդունված է համարել, որ եղունգների վրա առկա սպիտակ բծերը կանխատեսում են մոտալուտ երջանկությունը: Դիտարկումների համաձայն, սպիտակ բծերը վկայում են նաև իրենց տիրոջ չափից ավելի նյարդային խառնվածքի մասին:
Կարճ եղունգները վկայում են իրենց տիրոջ մարտական բնավորության մասին: Նման մարդիկ հայտնի վիճաբանողներ են, սիրում են ծաղրել ուրիշներին առիթով ու անառիթ:
Կարճ, հաստ ու ամուր եղունգները մատնանշում են իրենց տիրոջ ցասումնալից խառնվածքը:
Բոլոր կողմերից մաշկի մեջ ներաճած փոքրիկ եղունգները համարվում են զգայականության նշան:
Հոգեբանական թեստեր. ֆեյսբուք