Զախարովան մեկնաբանել է Ադրբեջանի խորհրդարանի փոխխոսնակ Ադիլ Ալիևի խոսքը

Չեմ կարծում, որ պետք է բացահայտեմ մանրամասները, թե ինչու էր այդպես ձևավորվել ռուսական պատվիրակությունը: Եղել են պատճառներ, և դավադրություն պետք չէ փնտրել: Այդ մասին դեկտեմբերի 16-ին ճեպազրույցի ժամանակ հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան՝ պատասխանելով տարածաշրջանում ԵԱՀԿ ՄԽ համանախագահների այցի ընթացքում ռուս համանախագահ Իգոր Պոպովի բացակայության պատճառների մասին հարցին:

«Ռուսական կողմը ներկայացվել է ե՛ւ Երեւանում, ե՛ւ Ադրբեջանում: Մի փնտրեք այդտեղ ինչ-որ խորին քաղաքական ենթատեքստ»:

Հիշեցնենք, որ Ֆրանսիայի համանախագահ Ստեֆան Վիսկոնտին եւ ԱՄՆ-ի համանախագահ Էնդրյու Շոֆերն այցելել էին Բաքու դեկտեմբերի 12-13-ին եւ Երեւան դեկտեմբերի 13-14-ին: Այցելելու անհնարինության պատճառով ռուս համանախագահ Իգոր Պոպովին ներկայացրել է Բաքվում Ռուսաստանի դեսպան Միխայիլ Բոչերնիկովը, իսկ Երևանում՝ Ռուսաստանի գործերի հավատարմատար Ալեքսեյ Սինեգուբովը:

Զախարովան խոսել է նաև Ղարաբաղյան հակամարտության գոտում գերիների փոխանակման գործընթացը վերաբերյալ, ասելով, որ «բոլորը բոլորի դիմաց» սկզբունքով գերիների փոխանակմանը մեծ նախապատրաստական ​​աշխատանքներ են նախորդել, որոնք իրականացվել են ռուս խաղաղապահների կողմից ադրբեջանական եւ հայկական կողմերի հետ:

Զախարովայի խոսքով` Ղարաբաղում խաղաղապահ ուժերի հրամանատար, գեներալ-լեյտենանտ Ռուստամ Մուրադովը նախօրեին մանրամասն պատմել է գործընթացի մասին:

«Ռուս խաղաղապահները կշարունակեն նպաստել եռակողմ համաձայնագրի հետագա անվերապահ իրականացմանը»,- հրամանատարի խոսքերը մեջբերել է Զախարովան:

Հիշեցնենք, որ նոյեմբերի 9-ին եռակողմ հայտարարություն էր ստորագրվել: Սակայն ոչ ոք համաձայնագրի մասին պաշտոնապես չի հայտարարել:

Մարիա Զախարովան մեկնաբանել է Ադրբեջանի խորհրդարանի փոխխոսնակ Ադիլ Ալիևի խոսքն այն մասին, որ «Ռուսաստանն իրավունք չունի միջամտելու Լեռնային Ղարաբաղում ադրբեջանական հատուկ ծառայությունների հակաահաբեկչական գործողությանը և Հայաստանի հետ միասին զգալի կորուստներ կկրի»:

Ըստ Զախարովայի՝ բոլոր հայտարարությունները, որ անում են հակամարտության (ղարաբաղյան – խմբ.) անմիջական կողմերը և ոչ տարածաշրջանային խաղացողները, պետք է ուղղված լինեն գլխավոր նպատակին հասնելուն, հատկապես երկարաժամկետ խաղաղությանը և լիաչափ կարգավորմանը: 

«Յուրաքանչյուր հայտարարություն, որ արվում է, պետք է կշռադատվի հատկապես այն տեսակետից, թե ինչպիսի օգուտ կամ ինչպիսի վնաս կարող է ունենալ: Հաշվի առնելով այն, թե ինչպիսի կարեւորագույն, բարդագույն աշխատանք է կատարվել, որ ամեն դեպքում յուրաքանչյուր բառը պետք է կշռադատվի, պետք է ինքներդ ձեզ հարց տաք, թե ինչի համար է այն արտաբերվում: Այն ամենը, ինչը վերաբերում է հողի վրա եւ գործառնական պարտավորությունների կոնկրետ մանրամասներին, ապա այս բոլոր հարցերը կարող են եւ պետք է երկրների միջեւ լուծվեն աշխատանքային կարգով:

Մենք երկխոսություն ենք վարում եւ գոյություն ունեցող բոլոր խողովակներով կապ ենք պահպանում թե՛ Բաքվի, թե՛ Երեւանի հետ: Բոլոր հարցերը պետք է լուծվեն հենց այս հունում: Ռուսաստանը հնարավոր ամեն ինչ անում է, որ տարածաշրջանում հաստատվի երկարատեւ եւ հաստատուն խաղաղություն: Մենք ելնում ենք այն հանգամանքից, որ նաեւ հակամարտության կողմերն արձագանքեն այս նպատակներին»,- նշել է Զախարովան: