«Իրանն ուշադիր հետևում է Պարսից ծոցի տարածքում ամերիկյան B-52H կործանիչների տեղաշարժին». իրանցի բարձրաստիճան գեներալ

Իրանցի բարձրաստիճան գեներալն ԱՄՆ-ին նախազգուշացրել է Պարսից ծոցում B-52H ամերիկյան ռմբակոծիչներին հետևելու մասին, հայտնում է tehrantimes.com –ը՝ հղում տալով IRNA պարբերականին:

«Վերահսկվում են տարածաշրջանային և միջտարածաշրջանային ուժերի բոլոր տեղաշարժերը, ներառյալ B-52H ռմբակոծիչների թռիչքը Պարսից ծոցի հարավում, երկրի օդային սահմաններից 150 կիլոմետր հեռավորության վրա, և հակաօդային պաշտպանության հենակետը հետևում է նրանց տեղաշարժերին»,- ասել է Իրանի հակաօդային պաշտպանության «Խաթամ ալ-Անբիայա» բազայի երկրորդ հրամանատար գեներալ Ղադեր Ռահիմզադեն: Նա հավելել է, որ թշնամու ցանկացած խախտում կհանդիպի հակաօդային պաշտպանության ուժերի ջախջախիչ պատասխանին:

Հիշեցնենք, որ ԱՄՆ-ի զինված ուժերը հինգշաբթի Պարսից ծոց օդային ցուցադրական առաքելության էին ուղարկել երկու B-52H ռմբակոծիչ, ինչը տեղի է ունեցել ԱՄՆ նախագահ Դոնալդ Թրամփի վարչակազմի վերջին շաբաթներին տարածաշրջանում առաջացրած լարվածության ֆոնին:

Նույն օրը ԱՄՆ-ի ռազմական կենտրոնական հրամանատարության ղեկավար Քենեթ Ֆ. Մըքքենզի կրտսերն ասել էր, որ ոչ մի ժողովուրդ ավելի պատրաստված չէ և ունակ չէ արագորեն տեղակայելու լրացուցիչ մարտունակություն ցանկացած ագրեսիայի պայմաններում: Նա հավելել էր, որ Միացյալ Նահանգները հակամարտության չի ձգտում, բայց հավատարիմ է մնում արտակարգ իրավիճակներին արձագանքելու իր քաղաքականությանը:

Ամերիկյան ռմբակոծիչների տարածաշրջանային թռիչքներն սկսել են անցյալ ամսվա վերջին՝ Իրանի միջուկային ծրագրի գլխավոր մասնագետ Մոհսեն Ֆախրիզադեի սպանությունից հետո:

Վերոնշյալ առաքելությունը (ներառում է նաև Սաուդյան Արաբիայի, Կատարի և Բահրեյնի օդանավերը) հաջորդել է ԱՄՆ-ի զինված ուժերի USS Nimits ավիակրի և այլ ռազմանավերի Պարսից ծոց տեղափոխվելուն:

Ամերիկյան քաղաքականությանն արձագանքելով՝ Իրանի նախկին պաշտպանության նախարար Հոսեյն Դեհղանը ասել է, որ փոքր, մարտավարական բախումը կարող է Իրանի և ԱՄՆ-ի միջև լուրջ պատերազմի վերածվել և աշխարհը չի կարող դիմանալ նման ճգնաժամի: Նա հավելել էր, որ Իրանը պատրաստ է դիմակայել դրան, սակայն կողմ է բանակցային գործընթացին:

Պաշտպանության նախկին նախարարի արձագանքն ուղղված էր ԱՄՆ-ի ներկայիս վարչակազմի կողմից Իրանին հարվածներ հասցնելու մասին քննարկումներին, որոնց ավելի վաղ անդրադարձել էր The New York Times լրատվակնաը:

Հիշեցնենք, որ Իրանի միջուկային ծրագրի գլխավոր մասնագետ Մոհսեն Ֆախրիզադեն սպանվել էր նոյեմբերի 27-ին Թեհրանում տեղի ունեցած ահաբեկչության ընթացքում, որի համար Իրանի իշխանությունները մեղադրում են Իսրայելին: Սպանությունից անմիջապես հետո Իրանի Իսլամական Հանրապետության արտաքին գործերի նախարար Մուհհամադ Ջավադ Զարիֆն իր թվիթերյան էջում գրել էր, որ հարձակումն իրականացվել է «Իսրայելի լուրջ ցուցումներով»:

Վերջին տարիներին Իսրայելը կազմակերպել է ևս 5 իրանցի գիտնականի սպանություն: