Նիկոլ Քիդմանի գեղեցկության գաղտնիքը

1967 թ-ի հունիսի 20-ին Հոնոլուլու քաղաքում Էնթոնի Դեյվիդ Քիդմանի և Ժանել Էնն Մաքլեյնի ընտանիքում է ծնվել չքնաղ Նիկոլ Մերի Քիդմանը: Երեխայի ծնունդից անմիջապես հետո, աղջկա ընտանիքը տեղափոխվում է Վաշինգտոն, որտեղ մնում են այնքան, մինչև լրանում է Նիկոլի չորս տարին: Այնուհետև տեղափոխվում են Ավստրալիա' իր ծնողների հայրենիք, որտեղ էլ անցնում են դերասանուհու մանկության և պատանեկության տարիները:
Դիմագծերը, կապույտ աչքերն ու կարմիր մազերն աղջիկը ժառանգել է ծնողներից, որոնց էլ «պարտական է» իր գեղեցիկ արտաքինի համար, չնայած դերասանուհին ունի գեղեցիկ լինելու սեփական բանաձևը. «Եթե ուզում եք գեղեցիկ լինել, սիրահարվեք, դա միանշանակ օգնում է»: Բարձրահասակ, գեղեցիկ կառուցվածքով, ճկուն շարժումներով, ճենապակե մաշկով և յուրահատուկ կենդանի դեմքով այդ գեղեցկուհին ծնված էր հենց բեմի համար:

Արդեն դեռահաս տարիքում Նիկոլի մոտ ի հայտ են գալիս ստեղծագործական ընդունակություններ. «Երբ փոքր էի, հայրս ինձ համոզում էր, որ գրելու մեծ տաղանդ ունեմ և պետք է լրագրող դառնամ. դա ինձ ոգևորել էր, սկսեցի օրագիր պահել և գրառումներ անել: Այդ սովորությունն ինձ մոտ մինչ օրս պահպանվել է»: 10 տարեկանում Նիկոլն ընդունվում է դրամատիկական արվեստի դպրոց, որից հետո էլ հաջողությամբ սկսում է խաղալ Ավստրիալական երիտասարդական թատրոնում, ինչպես նաև Ֆիլիպ Սթրիթի թատրոնում, որտեղ ապագա դերասանուհին ստանում է վոկալ կրթություն և սովորում թատրոնի պատմություն։ Սրան զուգահեռ Նիկոլը սովորում է նաև Հյուսիսային Սիդնեյում աղջիկների համար նախատեսված միջնակարգ դպրոցում, միայն թե նա ստիպված է լինում վաղաժամ թողնել ուսումը, քանի որ մոր մոտ հայտնաբերվում է կրծքի քաղցկեղ։ Աղջիկն իրեն ամբողջովին նվիրում է տան հոգսերին, որի ընթացքում մայրն անցնում է բուժման կուրսեր և վերականգնվում հիվանդությունից հետո։

Հեռուստաէկրանին Նիկոլի դեբյուտային դերը կայանում է, երբ նա ընդամենը 15 տարեկան էր. Պետա Ուիլսոնի «Bop girl» երգի հիման վրա նկարված տեսահոլովակում նկարահանումը, որին էլ հաջորդում են նկարահանումները ավստրիալական սերիալներում: Սակայն դերասանուհուն համաշխարհային ճանաչում է բերում և դեպի Հոլիվուդ ճանապարհ հարթում այն դերը, որ նա ստանում և մարմնավորում է «Մեռած ճահճուտը» ֆիլմում, իսկ դրան հաջորդող ֆիլմն էլ' «Ամպրոպի օրերը» ճակատագրական դեր խաղաց դերասանուհու անձնական կյանքում: Չքնաղ Նիկոլ Քիդմանի և Թոմ Քրուզի հեռուստատեսային սիրավեպը դարձավ իրականություն և ավարտվեց նրանց հարսանիքով: «Ես ինքս չէի ուզենա ամուսնանալ, իսկ Թոմը, բարեբախտաբար, ուզեց»,- հետագայում հիշում է դերասանուհին:
Երկար ժամանակ համարվում էին հոլիվուդյան ամենաերջանիկ զույգը: Սակայն նրանք երեխա չէին ունենում, ինչ էլ խանգարում էր լիարժեք երջանկությանը: Ի վերջո, որոշում են երեխաներ որդեգրել' աղջիկ և տղա: Նիկոլը շարունակում է նկարահանումները ֆիլմերում, նրա մասնակցությամբ կինոնկարները վառ էին և բազմազան: «Լայն փակված աչքերով» ֆիլմի նկարահանումներից հետո, հոլիվուդյան ամենաներդաշնակ թվացող զույգը բաժանվում է, իսկ նրանց բաժանության հիմնական պատճառն այդպես էլ անհայտ է մնում:

Մի քանի շաբաթ տևած սթրեսային վիճակից հետո, դերասանուհին վերադառնում է իր աշխատանքին' ի շնորհիվ իր ուժեղ կամքի, նպատակասլացության և աշխատասիրության: Քրուզի հետ բաժանումից հետո, ֆիլմը, որում Նիկոլը նկարվում է, մեծ աղմուկ է բարձրացնում: Խոսքը ռեժիսոր Բազ Լուրմանի երկար սպասված «Մուլեն Ռուժ» ֆիլմի մասինն է։ Այդ ֆիլմ-մյուզիքլում Քիդմանը խաղում է կաբարեի պարուհի և կուրտիզանուհի Սաթինին, նրա խաղընկերն այդ ֆիլմում Էվան Մաքգրեգորն էր: Կաբարեն երաժշտական թատրոնի վերածելու անհրաժեշտ գումարը հավաքելու համար Քիդմանի մահացու հիվանդ հերոսուհին պետք է գայթակղի հարուստ չարագործ Հերցոգին՝ Ռիչարդ Ռոքսբուրգի կատարմամբ. դժբախտաբար, Սաթինը սիրահարվում է աղքատ պոետին (Էվան Մաքգրեգոր), ով վարձված էր գրելու ապագա թատրոնի առաջին պիեսը։ Այդ ֆիլմի համար նա առաջադրվում է «Օսկարի», արժանանում իր երկրորդ «Ոսկե գլոբուսին»' «Լավագույն դերասանուհի՝ մյուզիքլում կամ կատակերգությունում» անվանակարգում։ Դրանից հետո Քիդմանի ստեղծագործական կյանքն ընթանում է հարթ, առանց խոչընդոտների:

2003 թ. դառնում է «Օսկար» մրցանակի դափնեկիր «Օսկար լավագույն դերասանուհու համար» անվանակարգում' «Ժամեր» ֆիլմում դերակատարման համար, ինչպես նաև Ոսկե Գլոբուսի եռակի մրցանակակիր է: Չնայած հագեցած և գերծանրաբեռնված ստեղծագործական առօրյաին, Նիկոլը ժամանակ է գտնում նաև անձնական կյանքի համար: 2006թ-ին ամուսնանում է Քեյթ Ուրբանի հետ:

Ես սիրահարվում եմ այն բոլոր հերոսներին, որոնց մարմնավորում եմ:
Ինձ դուր է գալիս դերասանուհի լինելը, բայց ինձ դուր չի գալիս մնացած ամեն ինչը, որ սովորոբար կապված է դրա հետ' հետաքրքրությունը ճանաչված անձնանց հանդեպ:
Ինձ պետք չէ մերկանալ սեքսուալ լինելու համար:
Պետք է փորձել ապրել այս օրով, ժպտալ և հիշել, որ վաղն արդեն ուրիշ օր է:
Երբ հրաժարվես վերահսկել ապագադ, այդ ժամանակ երջանիկ կլինես:
Կարևոր չէ, թե ինչ է տեղի ունենում քո կյանքում, թե ինչ ես դու ապրել, միևնույն է' դու միշտ կարող ես սիրահարվել:
Ամենաշատը վախենում եմ նրանից, որ հետ նայեմ ու ասեմ' ահա դրանք էին իմ լավագույն տարիները:
Ես հավատում եմ սիրուն, նրան, որ սերն է ղեկավարում աշխարհը: