Եվրամիության դիվանագիտության ղեկավարը նոր տերմին է հնարել Ռուսաստանի և Թուրքիայի քաղաքականության համար

Արտաքին քաղաքականության և անվտանգության հարցերով Եվրամիության գերագույն ներկայացուցիչ Ժոզել Բորելը հայտարարել է, որ Ռուսաստանի և Թուրքիայի հարաբերությունների «ասթենացումն» այդ երկրներին թույլ է տվել կիսել ազդեցության ոլորտները Սիրիայում, Լիբիայում և Կովկասում, հաղորդել է ՌԻԱ Նովոստին:

«Հինգ տարի առաջ Ռուսաստանը և Թուրքիան ներկա չեն գտնվել կենտրոնական Միջերկրածովում, իսկ այժմ նրանք խաղ են վարում: Մենք ապրում ենք բազմաբևեռ աշխարհում, որտեղ անդրկուլիսային գործեր գոյություն ունեն մի քանի խաղորդների միջև, որոնք դիմակայում են մյուսներին: Մենք դա անվանում ենք «ասթենացում»: Ռուսաստանը և Թուրքիան սկզբում անջատ էին, բայց գտան ընդհանուր շահեր, իսկ այնուհետև պայմանավորվեցին կիսել իրենց ազդեցությունը: Դա տեղի ունեցավ Սիրիայում, դա տեղի է ունենում Լիբիայում: Դա արդեն տեղի է ունեցել Կովկասում»,- հայտարարել է նա՝ հանդես գալով «Միջերկրածովյան երկխոսություններ» խորհրդաժողովում, որն անցկացվում է Իտալիայի ԱԳ նախարարության աջակցությամբ:

Եվրամիության դիվանագիտության ղեկավարն ընդգծել է, որ հայտնվել են հակամարտութունների նոր օջախներ այն դեպքում, երբ հները մնացել են չլուծված: «Իսրայելա-պաղեստինյան հակամարտությունը շարունակվում է հեռանկարների բացակայությամբ: Տեսնենք, թե ինչպես կլինի Բայդենի օրոք: Թրամփի օրոք այդ գործընթացն արգելափակված էր»,-ասել է Բորելը: «Մենք՝ եվրոպացիներս, երկրների բնակիչներին օգնել ենք հաղթահարել այդ հակամարտությունների հետևանքները, հումանիտար և տնտեսական օգնություն ենք ցուցաբերել: Բայց այժմ պետք է ինքներս լուծենք հակամարտությունները, պետք է ավելի խոր մասնակցենք մերձավորարևելյան խաղաղ գործընթացին, Լիբիայում և Սիրիայում ճգնաժամերի լուծմանը… Բայց ոչ մի խաղորդ չի կարող Եվրոպայի հետ մրցել խաղաղ լուծումներին աջակցելու գործում, և դա պետք է տարվի ՄԱԿ-ի անմիջական համակարգմամբ: Սիրիայում, Լիբիայում և Կիպրոսում, Թուրքիայի հանդեպ հարգանքով հանդերձ, անհատական աշխատանքները բավարար չեն լինի»,- հայտարարել է եվրակոմիսարը: