ՌԴ ԱԳՆ. ԼՂ-ում ռուս խաղաղապահները շարունակել են փախստականների վերադարձի համար բարենպաստ պայմաններ ստեղծել

Լեռնային Ղարաբաղում ռուս խաղաղապահները շարունակել են փախստականների վերադարձի համար բարենպաստ պայմաններ ստեղծել, ականազերծման, անհետ կորած զինծառայողների եւ զոհվածների մարմինների որոնման աշխատանքներ են իրականացրել: Այս մասին այսօր ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:

Նրա խոսքով՝ մարդասիրական արձագանքման կենտրոն է տեղակայվել, որի գործունեությանը ներգրավված են մի քանի տասնյակ դաշնային նախարարություններ, գերատեսչություններ եւ գործակալություններ:

«Այդ աշխատանքներին միացել են Ադրբեջանի եւ Հայաստանի պրոֆիլային գերատեսչությունները: Ինչպես նաեւ ուղարկվել են մարդասիրական բեռների առաջին խմբաքանակները: Ռուսաստանի արտաքին գործերի նախարարության գծով մենք մոբիլիզացրել ենք միջազգային աջակցությունը ԵԱՀԿ-ի, ինչպես նաեւ ՄԱԿ-ի կազմակերպությունների շրջանակներում: Արդեն ակտիվ գործում է Կարմիր Խաչի միջազգային կոմիտեն, մենք նաեւ աշխատում ենք փախստականների հարցերով ՄԱԿ-ի Գլխավոր հանձնակատարի գրասենյակի, ՅՈՒՆԵՍԿՕ-ի, ՅՈՒՆԻՍԵՖ-ի, ՄԱԿ-ին առընթեր Առողջապահության համաշխարհային կազամակերպության հետ: Բացի այդ, մենք կողմերին ուղղորդում ենք չքաղաքականացնել մարդասիրական դոսյեն, անհապաղ սկսել աշխատանքը: Դա կարեւոր քայլ է մշակութային հուշարձանների եւ սրբավայրերի պահպանման, միջդավանական եւ միջէթնիկական հաշտեցման հասնելու հարցում»,-նշել է Զախարովան: