Նախկին նախագահների խորհրդավոր լռությունը. «Հրապարակ»

«Հրապարակ» թերթը գրում է.

«Արցախի կապիտուլյացիայի ստորագրումից հետո խորհրդավոր լռություն են պահպանում Արցախի և Հայաստանի նախկին նախագահները, բացառությամբ Լևոն Տեր-Պետրոսյանի, ով մի քանի հայտարարությամբ է հանդես եկել, հիմնականում՝ իշխանություններին քննադատող, մյուսներն անհաղորդ են ստեղծված իրավիճակին։

Երեկ տեղեկացանք, որ Բակո Սահակյանը, ով պատերազմի օրերին էքսնախագահներին և իշխանությանը կապող օղակն էր և միջնորդական առաքելությամբ փորձում էր հարցի լուծման ուղիներ գտնել, առողջական խնդիրներ ունի, կորոնավիրուսային վարակը հաղթահարել է, բայց բարդացումներ են առաջացել։ Հայտնի է, որ Սերժ Սարգսյանի կինը՝ Ռիտա Սարգսյանն է ծայրահեղ ծանր վիճակում։ Նրան երեկ արտերկիր տեղափոխեցին, նրա մոտ ևս կորոնավիրուս է ախտորոշվել։

Օրերս հայտնի դարձավ, որ Արկադի Ղուկասյանն է հանդիպել Տեր-Պետրոսյանի հետ, սակայն տարածված հաղորդագրությունից պարզ էր, որ առաջին նախագահը նրան ցույց է տվել Նիկոլ Փաշինյանի տեղը և ասել, որ իրեն հուզող հարցերի պատասխանները կարող է անձամբ նրանից ստանալ։

Իսկ Ռոբերտ Քոչարյանը որոշել է ասպարեզում չերևալ, որ ընդդիմությանը չվնասի, և մարդիկ չկարծեն, թե «նախկինները վերադառնում են»։ Սակայն, մեր տեղեկություններով, Վլադիմիր Պուտինն ամենօրյա կապի մեջ է նրա հետ, ընդ որում՝ գրավոր կապի միջոցով»:

Առավել մանրամասն՝ թերթի այսօրվա համարում: