Կոսաչյովը Ղարաբաղի հարցով ԱՄՆ-ի և Ֆրանսիայի հարցումը խանդ է անվանել

ԱՄՆ-ի եւ Ֆրանսիայի իշխանությունների՝ Լեռնային Ղարաբաղում հրադադարի մասին եռակողմ համաձայնագրի վերաբերյալ Ռուսաստանին ուղղված հարցումը կարելի է բացատրել Ռուսաստանի հաջողությունների հանդեպ խանդով: Նման կարծիք է հայտնել Դաշնության խորհրդի միջազգային հարցերի հանձնաժողովի ղեկավար Կոնստանտին Կոսաչյովը:

«ԱՄՆ-ի եւ Ֆրանսիայի հարցումը խանդ է, հանկարծ ինչ-որ բան կարող էր հաջող ստացվել առանց իրենց մասնակցության»,-ասել է նա «Միասին ՌԴ» հեռուստաալիքի եթերում:

Սենատորի խոսքով՝ Վաշինգտոնը եւ Փարիզն այժմ իրենց հարց են ուղղում՝ ո՞րն է այս իրավիճակից ելքը, ինչո՞ւ իրենք չկարողացան Լեռնային Ղարաբաղում խաղաղապահ առաքելություն իրականացնել այդքան հաջողված, ինչպես դա արեց Ռուսաստանը: Ընդ որում, քաղաքական գործիչն ընդգծել է, որ «բոլոր փուլերում (ԼՂ հարցով եռակողմ բանակցությունների) ռուս դիվանագետները կապի մեջ են եղել ԱՄՆ-ից եւ Ֆրանսիայից ներկայացուցիչների հետ»: Նա հավելել է, որ Ռուսաստանը կշարունակի Մինսկի խմբի մյուս անդամներին տեղեկացնել Ղարաբաղում խաղաղապահ գործողությունների ընթացքի մասին:

Նա նաեւ նշել է, որ Ադրբեջանում ռուս-թուրքական համատեղ մոնիթորինգային կենտրոնը «կհետեւի խաղաղապահ առաքելությանը, այլ ոչ թե կանցկացնի այն»:

Ավելի վաղ ԱՄՆ պետքարտուղար Մայք Պոմպեոյի եւ Ֆրանսիայի ԱԳ նախարար Ժան-Իվ Լե Դրիանի բանակցությունների արդյունքներով ԱՄՆ Պետդեպարտամենտի բարձրաստիճան ներկայացուցիչը հայտնել էր, որ ԱՄՆ-ն ակնկալում է մանրամասն տեղեկություն ստանալ ԼՂ շուրջ Թուրքիայի դերի մասին: Նրա խոսքով՝ որպես ԵԱՀԿ ՄԽ համանախագահ երկրներ ԱՄՆ-ն եւ Ֆրանսիան նախկինի պես հակված են իրենց դերին եւ խոստովանում են, որ «շատ հարցեր կան, որոնք ռուսները պետք է պարզաբանեն, ներառյալ՝ համաձայնագրի պարամետրերն ու Թուրքիայի դերը»: