Լավրով. Մոսկվան ակնկալում է, որ ՄԱԿ-ը միանա աշխատանքներին Ղարաբաղում

Մոսկվան ակնկալում է, որ ՄԱԿ-ի կառույցները, հետեւելով ԿԽՄԿ-ին, կմիանան հումանիտար խնդիրների լուծմանը Ղարաբաղում, երեքշաբթի ասել է Ռուսաստանի արտգործնախարար Սերգեյ Լավրովը, փոխանցում է «ՌԻԱ Նովոստի»-ն:

«Մենք ակնկալում ենք, որ կմիանան նաեւ այլ մարդասիրական կառույցներ, առաջին հերթին` ՄԱԿ-ի կառույցները: Ես նկատի ունեմ փախստականների հարցերով գերագույն հանձնակատարի գրասենյակը, հումանիտար հարցերի համակարգման գրասենյակը եւ, իհարկե, Լեռնային Ղարաբաղում նաեւ մշակութային ժառանգության պահպանման սուր խնդիրներ կան: Եվ այստեղ ՅՈՒՆԵՍԿՕ-ն կարող է իր դերը կատարել»,- ասել է նա լրագրողներին:

Նա նշել է, որ ԿԽՄԿ-ն երկար ժամանակ է ներկա տարածաշրջանում եւ դրա փորձը կարող է օգտակար լինել այլ կազմակերպությունների համար:

«Կարծում եմ, որ ռազմական գործողությունների դադարեցումն այդ պայմանագրերի հիման վրա, իհարկե, լրացուցիչ հնարավորություններ է ստեղծում Կարմիր խաչի միջազգային կոմիտեի աշխատանքի համար, որը ներկա է Հայաստանում եւ Ադրբեջանում, այդ թվում` Լեռնային Ղարաբաղը»,- ասել է նա լրագրողներին:

Ըստ նրա` ԿԽՄԿ-ն կարող է կարեւոր դեր ունենալ Լեռնային Ղարաբաղում տեղի ունեցածի հետեւանքների հաղթահարման հարցում: