ԱՄՆ իշխանությունները պատրաստվում են վարձով տալ Ալյասկայի արգելոցի տարածքները՝ նավթի և գազի արդյունահանման համար

ԱՄՆ վարչակազմը հայտարարել է, որ մտադիր է Ալյասկայի արգելոցներից մեկի տարածքները վարձով տալ էներգետիկ ընկերություններին՝ այնտեղ նավթ ու գազ արդյունահանելու նպատակով: ԱՄՆ ՆԳՆ համապատասխան վարչությունից ծանուցումը երկուշաբթի օրը էլեկտրոնային տեսքով տեղադրվել է Դաշնային ռեեստրում՝ ամերիկյան կառավարության պաշտոնական փաստաթղթերի տեղեկատուում, հաղորդում է ՏԱՍՍ-ը:

Ենթադրվում է, որ մրցույթի կդրվեն Բոֆորտի ծովի ափին մոտ 6,5 հազար քառակուսի կիլոմետր ընդհանուր տարածք ունեցող հողամասեր: Ներկայիս ամերիկյան դաշնային իշխանությունները շտապում են վարձով տալ դրանք մինչ ԱՄՆ նախագահի սպասվող փոփոխությունը։ Ըստ ամերիկյան լրատվամիջոցների՝ նոյեմբերի 3-ին կայացած ընտրություններում հաղթող է ճանաչվել դեմոկրատ Ջոզեֆ Բայդենը, որին հունվարին պետք է լիազորությունները հանձնի հանրապետական Դոնալդ Թրամփը:

Միաժամանակ, ինչպես զգուշացնում են տեղական փորձագետները, եթե ընտրությունների այս արդյունքները պաշտոնապես հաստատվեն, ԱՄՆ նոր վարչակազմը կարող է ընդհանրապես չեղյալ հայտարարել այդ հողամասերը վարձով տալու որոշումը, հատկապես եթե ՆԳՆ-ն չհասցնի ձեւակերպել այս ծրագրի շրջանակներում անհրաժեշտ բոլոր փաստաթղթերը: ԱՄՆ-ում ՆԳՆ-ը ուժային գերատեսչություն չէ, այն հիմնականում զբաղվում է դաշնային հողերի օգտագործման եւ բնական ռեսուրսների արդյունահանման հարցերով, ինչպես նաեւ համակարգում է ամերիկյան հնդկացիների՝ Ալյասկայի եւ Հավայան կղզիների բնիկների հետ կապված տարբեր ծրագրեր:

Բացի այդ, ինչպես նշում է Washington Post թերթը, պարզ չէ, թե որքանով գրավիչ կլինի ԱՄՆ վարչակազմի ներկայիս առաջարկը մասնավոր հատվածի համար` առաջարկվող վարձակալության ոլորտում անհրաժեշտ ենթակառուցվածքների բացակայության եւ բնիկների ու բնապահպանների կողմից ամերիկյան իշխանությունների ծրագրերի հանդեպ կտրուկ բացասական վերաբերմունքի պատճառով:

ԱՄՆ Կոնգրեսը 2017 թվականին թույլատրել է այս տարածաշրջանում էներգետիկ ռեսուրսների արդյունահանումը: Այս օրենսդրության մշակումը Հանրապետական կուսակցության նախաձեռնությունն է: Ըստ ԱՄՆ ՆԳ դեպարտամենտի գնահատականների՝ Բոֆորտի ծովի ափի այս հատվածում նավթի արդյունահանվող պաշարները կազմում են 4,25 միլիոն՝ 11,8 միլիոն բարել: