ՌԴ խաղաղապահների ուղեկցությամբ Երևանից 475 փախստական է վերադարձել Ստեփանակերտ

ՌԴ խաղաղապահները Երևանից Ստեփանակերտ են ուղեկցել 475 բնակչից բաղկացած փախստականների երկրորդ խումբը, հաղորդում է ՌԴ ՊՆ-ն:

«475 փախստականի տեղափոխող 19 ավտոբուսներն ուղեկցվել են ՌԴ խաղաղապահ զորախմբի և ռազմական ոստիկանության ուժերի կողմից և հասել են Ստեփանակերտի կենտրոնական հրապարակ»,- նշված է ՌԴ ՊՆ հաղորդագրությունում:

ՌԴ նախագահի հրամանագրով ստեղված հումանիտար արձագանքման միջգերատեսչական կենտրոնն ապահովել է Ստեփանակերտի բնակիչների վերադարձի անվտանգությունը:

Շաբաթ օրը ՌԴ խաղաղապահներ դեպի Արցախ էին ուղեկցել 250 փախստականի տեղափոխող 9 ավտոբուս:

Ստեփանակերտում ավարտվել է նաև ռուս խաղաղապահ ուժերի կառավարման համար հրամանատարական կետի տեղակայումը:

Նշվում է, որ շարունակվում է ռուս խաղաղապահների զորախմբի հիմնական ուժերի տեղափոխումը, որի հիմքը կազմում է Կենտրոնական ռազմական շրջանի 15-րդ առանձին մոտոհրաձգային բրիգադը:

«Ռազմատրանսպորտային ավիացիայի ինքնաթիռներով շարունակվում է անձնակազմի, սպառազինման և ռազմական ու հատուկ տեխնիկայի տեղափոխումը Հայաստան: Նոյեմբերի 18-ից սկսած իրականացվել է 118 չվերթ, այդ թվում 23-ը՝ վերջին 24 ժամում»,- պարզաբանել են ՌԴ ՊՆ-ից:

Հիշեցնենք, որ Նիկոլ Փաշինյանը նոյեմբերի 9-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը, բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: