Փաշինյանի թիվ մեկ խնդիրը, ակնհայտորեն, դարձել է սեփական աթոռը պահելը․ Հայաստանը թևակոխում է է ռեպրեսիաների ժամանակաշրջան. «Հրապարակ»

«Հայաստանը թևակոխել է ռեպրեսիաների ժամանակաշրջան։ Արցախի մասին տխրահռչակ փաստաթուղթ ստորագրած Նիկոլ Փաշինյանի թիվ մեկ խնդիրը, ակնհայտորեն, դարձել է սեփական իշխանությունը պահելը և այդ նպատակի համար ԱԱԾ-ն լծվել է ընդդիմադիրներին ու ընդդիմախոսներին «փակելու», Փաշինյանի հրաժարականի գործընթացը գլխատելու գործին։ Այն դեպքում, երբ մեր երկիրը կանգնած է ծանր մարտահրավերների առջև։ Ընդդիմադիր քաղաքական գործիչներին հետապնդելուց բացի, բերման են ենթարկել նաև հանրահավաքի ակտիվ մասնակիցներին։

Հանրահավաքի տեսագրությունը դիտելով՝ ԱԱԾ-ականները պարզել են, թե ով ով է և մտել են շարքային քաղաքացիների բնակարաններ։ Նույն գիշեր՝ լուսաբացին, օրինակ, հատուկ ջոկատայինները ներխուժել են Արցախի մարտերին կամավորագրված Խաչիկ Հովհաննիսյանի տուն և նրան բերման ենթարկել։ Երիտասարդը հանրահավաքին ելույթ է ունեցել տեսախցիկների առաջ ու կոշտ գնահատականներ հնչեցրել Նիկոլ Փաշինյանի և Արայիկ Հարությունյանի հասցեին։ «Թքեմ վրեդ, Նիկոլ Փաշինյան» գոռում էր նա ու բացատրություն պահանջում, թե ինչու նախապես չեն ասել, որ սա «ավտոմատներով» կռիվ չի ու պետք չի գնալ մսաղացի բաժին դառնալ։

Պատմում էր, որ հոկտեմբերի 8-ին ինքը իր ընկերների ջոկատով մտել է Ջաբրայիլ, բայց մարդ չի եղել։ «Ինչո՞ւ»՝ հարցերի տարափ էր տեղում երիտասարդը, խոսում ՊՆ ներկայացուցիչ Արծրուն Հովհաննիսյանի և Արայիկ Հարությունյանի հայտարարությունների հակասությունների, ինչպես ինքն էր ասում՝ «ստերի» մասին։ Երիտասարդը, պարզվում է, ԱԺ ԲՀԿ-ական պատգամավոր Կարինե Պողոսյանի փեսան է»,-գրում է թերթը:

Նյութն ամբողջությամբ կարդացեք թերթի այսօրվա համարում: