Մոսկվայի քաղաքային դատարանը երրորդ անգամ չի կարողացել Խաչատուրյան ավագ քույրերի գործով երդվյալների ընտրել

Մոսկվայի քաղաքային դատարանը կրկին չի կարողացել երդվյալների կոլեգիա ընտրել՝ նրանց մասնակցությամբ քննելու Խաչատուրյան ավագ քույրերի գործը, որոնք մեղադրվում են հոր սպանության մեջ։ Այս մասին ՏԱՍՍ-ին հայտնել է աղջիկներից մեկի փաստաբան Ալեքսեյ Լիպցերը։

Սա երդվյալներ ընտրելու երրորդ փորձն էր։ Նախկինում ընտրությունը տեղի չէր ունեցել նոր կորոնավիրուսային ինֆեկցիայով վարակվելու հետեւանքով տուժած կողմի չներկայանալու պատճառով։ «Աղջիկների գործով երդվյալների ընտրությունը հետաձգվել է դեկտեմբերի 2-ին»,- ասել է պաշտպանը։

Նիստի ժամանակ տուժած կողմի ներկայացուցիչները կրկին հայտարարել են հետաձգելու մասին՝ կապված տուժածներ Մարինա եւ Նաիրա Խաչատուրյանների հերթական հիվանդության հետ։ Քույրերի փաստաբաններն իրենց հերթին դատարանին խնդրել են բժշկական հաստատություններից տեղեկություններ պահանջել տուժածների հիվանդությունների վերաբերյալ, քանի որ կարծում են, որ նրանք դիտավորյալ դատավարությունը ձգձգում են։ «Նաիրա Խաչատուրյանը հոկտեմբերի 27-ին Բուտիրկսկու դատարանում մասնակցել է կրտսեր քրոջ գործով դատական նիստին»,- նշել է փաստաբանը։ Դատարանը բավարարել է այս միջնորդությունը։

Հիշեցնենք, որ Միխայիլ Խաչատուրյանը սպանվել էր 2018-ի հուլիսի 27-ին։ Երեք դուստրերը իրենց հորը դանակի եւ մուրճի բազմաթիվ հարվածներ էին հասցրել: Քննությամբ հաստատվել է, որ հանցագործության դրդապատճառը անձնական անբարյացակամությունն էր՝ պայմանավորված երկար ժամանակ նրանց պատճառված ֆիզիկական եւ հոգեկան տառապանքներով։ Քննությունն աղջիկների գործողությունը որակել է որպես նախնական համաձայնությամբ մարդկանց խմբով սպանություն։ Ընդ որում հիմնական գործից առանձնացված են կրտսեր քրոջ վերաբերյալ նյութերը, քանի որ նա փորձագետների կողմից նրան մեղսագրվող հանցագործության պահին անմեղսունակ է ճանաչվել։ ՔԿ-ն պնդում է, որ նրա նկատմամբ պետք է կիրառել բժշկական բնույթի միջոցներ, քանի որ նա հարկադիր բուժման կարիք ունի։ Նրա վերաբերյալ գործը քննվում է Բուտիրսկու դատարանում փակ ռեժիմով։