Մահացել է համաշխարհային ճանաչում ձեռք բերած բրիտանական հետախուզական գործակալ Ջեյմս Բոնդի դերասան Շոն Քոնորին

90 տարեկան հասակում կյանքից հեռացել է բրիտանացի դերասան Շոն Քոններին, ով համաշխարհային ճանաչում ձեռք բերեց բրիտանական հետախուզական գործակալ Ջեյմս Բոնդի դերով:

Փաստեր…
Շոտլանդացի կինոդերասան, ԱՄՆ-ի, Մեծ Բրիտանիայի, Ֆրանսիայի և մի շարք այլ երկրների պետական պարգևների դափնեկիր Շոն Քոններին հատկապես հայտնի է որպես Ջեյմս Բոնդի մասին պատմող ֆիլմաշարի առաջին դերասան։ Ընդհանուր թվով նրա մասնակցությամբ բոնդապատումի 7 ֆիլմ է նկարահանվել։ Կինոյի պատմության մեջ 6 դերասան են մարմնավորել Ջեյմս Բոնդին, բայց ամենահաջողվածները թերևս հենց նրա մասնակցությամբ ֆիլմերն են եղել։

Կինոյում սկսել է նկարահանվել սկսած 1950-ականների երկրորդ կեսից՝ սկզբնական շրջանում հեռուստատեսային ֆիլմերում։ Առաջին մեծ դերը կինոյում 1958 թվականին նկարահանված «Ուրիշ ժամանակ, ուրիշ տեղ» ֆիլմն էր։

Դերասանական աշխատանքից բացի նաև 10 ֆիլմի պրոդյուսեր է։
Շոն Քոններին ծնվել է 1930 թվականի օգոստոսի 25-ին Շոտլանդիայի Էդինբուրգ քաղաքում։ Հայրը՝ Ջոզեֆ Քոններին, բանվոր էր, իսկ մայրը՝ Էֆեմիի Մակլինը, հավաքարարուհի։ Առաջին մասնագիտությունը, որով նա աշխատել է եղել է կաթնամթերքի վաճառողի գործը։

Ծառայել է Մեծ Բրիտանիայի Թագավորական ռազմածովային ուժերում։
Հետաքրքիր է, որ Շոնը կինոյում խաղացել է գերազանցապես դրական կերպարների։ Նրա հերոսները արագաշարժ, ճարպիկ, ուժեղ ու հնարամիտ անձինք են՝ գաղտնի գործակալներ, լրտեսներ, զինվորականներ, թագավորներ և այլն։

Շոն Քոններին 2 անգամ ամուսնացել է։
Առաջին կինը Դայան Սիլենտոն է, ում հետ ամուսնացել է 1962 թվականին։ 1973 թվականին նրանք ամուսնալուծվել են։ Առաջին ամուսնությունից ունի մեկ որդի՝ Ջեյսոն Քոնների, ով նույնպես դարձել է դերասան։ 1975 թվականին ամուսնացել է մասնագիտությամբ նկարչուհի Միշելին Ռոքվեբրունի հետ, ում հետ ապրել է մինչև կյանքի վերջին օրերը…

Շոն Քոններիի հոբբին գոլֆն էր.
Նա ունեցել է սեփական հսկա գոլֆի դաշտ, որը գտնվում է Ֆրանսիայի հարավում։ 1999 թվականին այն վաճառել է գերմանացի միլիարդատեր Դիտմար Հոպպին։ Գոլֆից բացի նա նաև ֆուտբոլի մեծ սիրահար էր, իսկ իր նախընտրած թիմեր են շոտլանդական «Գլազգո Ռեյնջերսը» և «Սելթիկը»։ Երիտասարդ ժամանակ անգամ զբաղվել է բոդիբիլդինգով։

Քոններին ակտիվ զբաղվում էր քաղաքական գործունեությամբ և հանդիսանում է Շոտլանդիայի Ազգային կուսակցության անդամ, կողմ էր երկրի՝ Անգլիայից ամբողջովին անկախանալու գաղափարին…

Ընդհանուր թվով, Քոններին ստացել է 32 տարբեր կինոմրցանակ, ներկայացված է եղել ևս 15-ի, որոնց թվում.
1 Օսկար երկրորդ պլանի լավագույն դերասան անվանակարգում՝ 1988 թվականին «Անձեռմխելիները» ֆիլմում խաղացած դերի համար, 3 Ոսկե Գլոբուս, Բրիտանական կինոյի և հեռուստատեսության ակադեմիայի 5 մրցանակ, 2 BAFTA կինոմրցանակ և այլն…