Vox. Սիլիկոնյան հովիտը շատ ավելի միջոցներ է ծախսում Բայդենին աջակցության համար, քան 2016թ․՝ Քլինթոնին օգնելու համար

Սիլիկոնյան հովիտը շատ ավելի շատ գումար է ծախսել 2020թ․ ԱՄՆ նախագահ Դոնալդ Թրամփի դեմ քարոզչություն իրականացնելու համար, քան 2016-ին նախագահի նախկին թեկնածու Հիլարի Քլինթոնին օգնելու համար, գրում է Vox-ը:

«Տեխնոինդուստրիան մեծ աջակցություն է ցուցաբերել Հիլարի Քլինթոնին 2016թ.։ Բայց այդ ժամանակ Թրամփը ընդամենը թեկնածու էր, առանց ներգաղթի, կլիմայի փոփոխության կամ տեխնոլոգիական արդյունաբերության հետ կապված մտահոգությունների քաղաքական նշանակալի փոփոխությունների փորձի: Եվ Սիլիկոնյան հովիտը ժամանակ չուներ պատրաստվել նոր խմբեր բացելու, ավելի շատ միջոցներ հայթայթելու եւ իր էներգիան մոբիլիզացնելու այն բարդ եղանակներով, որոնք ուներ մինչեւ 2020 թվականը»,- նշում է թերթը:

«Եվ այս անգամ Սիլիկոնյան հովիտը, միլիարդատերերի գլխավորությամբ, ավելի ընկղմվեց կուսակցական քարոզարշավների աշխարհում»,- գրում է հրատարակությունը՝ վկայակոչելով Recode-ի ընկերությունների ֆինանսավորման տվյալների վերլուծությունը:

Այս կապակցությամբ Vox-ը նշում է, որ Ջո Բայդենին աջակցելու համար ավելի շատ միջոցներ են հատկացվել, քան Քլինթոնին աջակցելու համար:

Որպես օրինակ՝ հրատարակությունը մեջբերում է ծրագրային ապահովման արդյունաբերության բարձրաստիճան ներկայացուցիչ Քենեթ Դուդայի խոսքերը, ով հայտարարել է, որ այս ընտրությունների համար ինքը երեք անգամ ավելի շատ գումար է ծախսել, քան 2016-ին՝ Թրամփին հաղթելու պայքարում:

Դուդան իրեն բնութագրել է որպես քաղաքականապես չափավոր անձնավորություն՝ միաժամանակ նշելով, որ խորապես անհանգստացած է, քանի որ կարծում է, որ Թրամփը երկիրը տանում է դեպի «ավտոկրատիա»: