Ֆրանսիայում ուսուցչի սպանության գործով դատարանի առաջ կկանգնի 7 մարդ

Ֆրանսիայում 7 մարդ դատարանի առաջ կկանգնի մայրաքաղաքի արվարձանում արմատական իսլամիստի կողմից ուսուցիչ Սամուել Պատիի սպանության գործով։ Այս մասին հայտնել է AFP-ն՝ վկայակոչելով դատական աղբյուրներին։

Այս գործով նախնական լսումների ժամանակ կարող են մեղադրանքներ առաջադրվել յոթ ձերբակալվածներին։ Նրանց թվում են երկու անչափահաս, որոնց կասկածում են փողի դիմաց ահաբեկչին ուսուցչի մասին տեղեկությունների փոխանցման մեջ, արմատականի հայրը, որը ակտիվորեն քննադատել է Պատիին, իսլամիստ ակտիվիստ Աբդելհաքիմ Սեֆրիուին եւ հարձակվողի երեք ընկերները, որոնք նրան ուղեկցել են զենքը գնելիս։

Ահաբեկչության վերաբերյալ գործով մյուս ձերբակալվածներին ազատ են արձակել։ Ֆրանսիայի ոստիկանությունն ավելի վաղ հայտնել էր 16 մարդու ձերբակալման մասին, որոնցից վեցին երեքշաբթի երեկոյան ազատել էին, փոխանցում է ՏԱՍՍ-ը։

Հարձակումը կատարվել էր հոկտեմբերի 16-ի երեկոյան Քոնֆլան Սենտ Օնորին քաղաքում դպրոցի մոտ, որտեղ ուսուցիչը դասավանդում էր պատմություն եւ աշխարհագրություն։ Հանցագործը կտրել էր նրա կոկորդը։ Նա փորձել էր սպառնալ ոստիկաններին, որոնք ժամանել էին դեպքի վայր, բայց գնդակահարվել էր։ Այս գործի քննությունը հանձնարարվել է Ֆրանսիայի հակաահաբեկչական դատախազությանը։ Երկրի նախագահը տեղի ունեցածը անվանել է ահաբեկչական հարձակում։