«Երկիրս հարձակումների է ենթարկվում. եթե անհրաժեշտ լինի, ես կլինեմ բանակում». Լևոն Արոնյանը հարցազրույց է տվել Chess24-ին

Լևոն Արոնյանը հարցազրույց է տվել Chess24 պարբերականին՝ ներկայացնելով Արցախում և Հայաստանում տիրող իրավիճակը:

«Իմ երկիրը հարձակումների է ենթարկվում Թուրքիայի և Ադրբեջանի կողմից: Եթե անհրաժեշտ լինի, ես կմիանամ բանակին: Մենք պաշտպանում ենք մեր խաղաղ ապրելու իրավունքը: Յուրաքանչյուր հայի համար այս պահին սա է միակ մտահոգությունը: Ես վերադանում եմ և կանեմ ամենն, ինչ իմ ուժերի սահմաններում է երկրիս օգնելու համար»,- ասել է Արոնյանը:

Արոնյանն այս հարցազրույցը տվել է Նորվեգիայում ընթացող առաջնության եզրափակչում Մագնուս Կառլսենի նկատմամբ տարած հաղթանակից մեկ օր անց:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 19-ի դրությամբ Արցախի զինուժը խոցել է հակառակորդի՝ 16 ուղղաթիռ, 22 ինքնաթիռ, 195 անօդաչու թռչող սարք, 566 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6259 զոհ։ Հայկական կողմից, նախնական տվյալներով, կա 729 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 36 քաղաքացիական անձ, վիրավորվել է 115 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում: