Ով եմ ես ՔԵԶ համար. ինչպես լրջացնել տղամարդու հետ հարաբերությունները
Կանոնավոր հաղորդակցվում եք, շաբաթվա գրեթե բոլոր երեկոները միասին եք անցկացնում, ճանաչում եք մեկդ մյուսի բոլոր ընկերներին: Ամեն ինչ հրաշալի է, բացի մի բանից. նա պաշտոնապես քո ընկերը չէ: Թույլ տուր շտկենք այդ իրավիճակը:
27-ամյա Քեյթը ընկերոջ՝ Քեյվինի հետ ընթրելու էր գնացել: Նրանք արդեն մի քանի ամիս է՝ հանդիպում էին: «Երբ դուրս էինք գալիս, լսեցի՝ ինչպես մատուցողն ասաց. «Քեզ ու ընկերուհուդ հաճելի երեկո եմ մաղթում»,- պատմում է Քեյթը: - Ես Քեյվինի ընկերուհին չեմ: Այդ պահին հասկացա, որ իրավիճակը շտկելու ճիշտ ժամանակն է: Մենք այդ ռեստորանում մշտական այցելուներ էինք, և նրանք, անշուշտ, եզրակացրել էին, որ մենք հանդիպում ենք: Մատուցողի շնորհիվ հանկարծ գիտակցեցի, որ ինձ իսկապես մտահոգում է այն, որ այսքան ժամանակ միասին լինելով՝ մենք դեռևս իսկական զույգ չենք համարվում»:
Ըստ փորձագետների՝ նման իրավիճակները (երբ առկա են հարաբերություններին բնորոշ բոլոր նշանները, սակայն կոնկրետ հարաբերություններ չկան) չափազանց սովորական են դառնում: «Շատ կանայք կայծակնային արագությամբ լրջացնում են հարաբերությունները, իսկ հետո չգիտեն՝ ինչպես ազատվել այդ իրավիճակից»,- ասում է Ջեն Բերմանը՝ ամերիկյան հայտնի փորձագետներից մեկը:
Վերադառնանք չհստակեցված հարաբերություններին (կարող ես դրանք «գրեթե հարաբերություն» անվանել), որոնք կարելի է բաժանել երկու տեսակի: Առաջին՝ երբ ցանկանում ես, որ նա «երիտասարդի» կարգավիճակից անցում կատարի «ընկերոջ» կարգավիճակի, և երկրորդ՝ երբ պարզապես ժամանակ ես անցկացնում' առանց ապագայի մասին մտածելու: Անկախ նրանից, թե որ ճակատում ես, կարդա մեր խորհուրդները:
Հստակեցրու
Այնպիսի դեպքերում, ինչպիսին Քեյթինն է (երբ ցանկանում ես լրջացնել հարաբերությունները), այդ հարցը բարձրացնելը և նրան ուղղակիորեն հարցնելը, թե ինչ է իրականում ուզում, դժվար կարող է լինել: «Շատ կանայք վախենում են բարձրաձայնել, որ ավելին են ակնկալում հարաբերություններից՝ մտածելով, որ դա կարող է որպես պարտադրանք հնչել»,- ասում է Բերմանը: Այնուամենայնիվ, պետք է հաղթահարել վախը և բարձրացնել այդ հարցը: Պետք չէ դիմել կտրուկ ձևակերպումների, հակառակը՝ սկսիր դրական կետից: Օրինակ. «Այն, ինչ մենք ունենք, անկրկնելի է, և դա ինձ մեծ բավականություն է պատճառում: Սակայն առաջ գնալու համար ես պետք է հասկանամ՝ ինչ ես դու մտածում մեր հարաբերությունների մասին: Սովորաբար այս փուլում ես ավելի շատ հակված եմ տեսնելու կոնկրետ տրամադրվածություն»: Հասկացրու նրան, որ հենց այդ պահին իրենից պատասխան չես ակնկալում, ապա շրջանցիր թեման: Եթե տղամարդն իսկապես լուրջ է տրամադրված, նա հստակ պատասխան կտա՝ ասելով, որ ուզում է քեզ տեսնել իր ընկերուհու դերում: «Եթե նա այն տղամարդն է, ով քեզ պետք է, նրան քո հարցը չի վախեցնի»,- ասում է Բերմանը:
Քանդիր կապանքները
«Գրեթե հարաբերություններ»-ի մյուս կողմն այն է, որ դրանք փարատում են քո միայնությունը: «Դու, իհարկե, գիտես, որ այդ տղամարդն այնքան էլ չի համապատասխանում քեզ, բայց այդ հարաբերություններից դու դրական լիցքեր ես ստանում,- բացատրում է հարաբերությունների փորձագետ Դեբի Մաջիդսը: - Գուցե մտածում ես, որ պարզապես ժամանակ ես անցկացնում նրա հետ, մինչև որ մեկ ուրիշ՝ քեզ ավելի համապատասխան տղամարդ կհայտնվի քո կյանքում: Սակայն նման դեպքերում դու սահմանափակում ես ինքդ քեզ»: Պատկերացրու. ընկերուհուդ հետ գնում ես որևէ երեկույթի, մեկ-երկու բաժակ կոկտեյլից հետո հասկանում ես, որ իրավիճակը պայթյունավտանգ է, դու շրջապատված ես համակրելի երիտասարդներով, բայց' ոչ... դու կանգ ես առնում: Ի՞նչ է սա նշանակում: Դու սահմանափակում ես քո գործողությունները, քանի որ արդեն իսկ քո կյանքում տղամարդ կա, որի հետ ցանկացած ժամանակ կարող ես հանդիպել: Սակայն, ո՞վ գիտե՝ ում հանդիպած կլինեիր այդ օրը, կամ եթե մերժած չլինեիր այն երիտասարդին, ինչ նոր ընթացք կունենային այդ հարաբերությունները: «Պետք է ազատվել այն կապանքներից, որոնք կարող են խանգարել նոր հարաբերություններ ստեղծելիս»,- խորհուրդ է տալիս Մաջիդսը:
Շրջանցիր «գրեթե»-ի սահմանը
Մերժիր նրան մի շարք հարցերում և ինքդ էլ դրսևորիր խուսափողական վարքագիծ, ու նա շահագրգռված կլինի ձեր հարաբերություններն ավելի պաշտոնական դարձնել: