ՀՀ առաջին օմբուդսմենը դիմել է ԵԱՀԿ ՄԽ համանախագահ երկրների նախագահներին

ՀՀ առաջին օմբուդսմեն Լարիսա Ալավերդյանը դիմել է ԵԱՀԿ ՄԽ համանախագահ երկրների նախագահներին՝ առաջարկելով օգտագործել տիեզերական զոնդաժի համակարգը Լեռնային Ղարաբաղի հակամարտության գոտում հրադադարի ռեժիմի պահպանումը հսկելու համար:

NEWS.am-ը ներկայացնում է առաջին օմբուդսմենի դիմումը՝ ուղղված ԵԱՀԿ ՄԽ համանախագահ երկրների նախագահներին.

«Ռուսաստանի, Միացյալ Նահանգների եւ Ֆրանսիայի հարգելի՛ Նախագահներ,

Բարձր գնահատելով եւ հավատալով Ձեր անկեղծ հետաքրքրվածությանը Լեռնային Ղարաբաղում իրավիճակի շուտափույթ ապաէսկալացիայի հարցում, Ձեր ուշադրությունն եմ հրավիրում երկրի վրա եւ օդային տարածքում ԵԱՀԿ Մինսկի խմբի համանախագահ երկրների տիեզերական միջոցների դիտորդական սարքեր տեղակայելու՝ մինչ օրս չիրականացված հնարավորությանը: Մոնիթորինգի եւ հրադադարի փաստերի արձանագրման տվյալ հուսալի միջոցը մշակվել է Հայաստանի պաշտպանության նախարարության Ազգային եւ ռազմավարական հետազոտությունների ինստիտուտի կողմից Ռուսաստանի եւ ԱՄՆ-ի ռազմավարական վերլուծության պետական հաստատությունների հետ համագործակցությամբ:

Տիեզերական զոնդաժի մշակված տվյալների տրամադրումը թույլ կտա հստակ եւ անվերապահորեն հաստատել եւ պատասխանատվության ենթարկել հրադադարի ռեժիմի խախտողներին:

Մոնիթորինգի համար ցամաքային եւ օդային միջոցներն ուժեղացնելու ԵԱՀԿ ՄԽ համանախագահների կոչը ուղղված է ապագային: Այդ կոչի իրականացման համար անհրաժեշտ է Ադրբեջանի համաձայնությունը: Այն դեպքում, երբ տիեզերական զոնդաժի համար ազգային կառավարության համաձայնությունը չի պահանջվում: Եվ մենք նաեւ կարող ենք սահմանել ոչ միայն հետագա խախտումների, այլ արդեն առկա խախտումների փաստը:

Այդպիսով վերջ կդրվի անօգուտ վեճերին, որոնք առաջանում են ամեն անգամ եւ այն ժամանակ, երբ Ադրբեջանը՝ Թուրքիայի աջակցությամբ եւ ահաբեկիչների ներգրավմամբ ռազմական ագրեսիա սկսելով, մեղադրում է Հայաստանին:

Հուսով եմ՝ իմ դիմումը կհասնի Ձեզ եւ կօգնի երկարատեւ խաղաղություն սահմանել տարածաշրջանում:

Աստված մեզ օգնական»: