Դատավորները շտապում են. ովքեր դուրս եկան «խաղից». «Ժողովուրդ»

«Ժողովուրդ» թերթը գրում է.

« «Ժողովուրդ» օրաթերթի տեղեկություններով՝ հինգշաբթի օրը տեղի կունենա Բարձրագույն դատական խորհրդի նիստ, որի ժամանակ կընտրեն Վճռաբեկ դատարանի նախագահ: «Ժողովուրդ» օրաթերթը գրել էր, որ երկուշաբթի օրը Բարձրագույն խորհուրդը Վճռաբեկ դատարանի բոլոր դատավորներին հրավիրել է հանդիպման, և քննարկելու էին ընդհանուր հարցեր, այդ թվում՝ Վճռաբեկ դատարանի նախագահի ընտրության հարցը:

Եվ, ահա, մեր տեղեկություններով՝ Նախշուն Տավարացյանը, Վարդան Ավանեսյանն ու Սերժիկ Ավետիսյանը ներկա չեն եղել հանդիպմանը, և դա դատական համակարգում խոսակցությունների տեղիք է տվել, որ, ստացվում է, իրենք չեն ցանկանում լինել Վճռաբեկ դատարանի նախագահ:

Մեր տեղեկություններով՝ հանդիպման ժամանակ ներկաներից հետաքրքրվել են՝ ինչպես են տեսնում կառույցի հետագա ճակատագիրը, ում են տեսնում որպես Վճռաբեկ դատարանի նախագահ, և արդյունքում էլ որոշվել է ընտրությունը կատարել հինգշաբթի օրը: Այս շտապողականությունը պատճառներ ունի. Բարձրագույն դատական խորհուրդը Վճռաբեկ դատարանի նախագահի թեկնածու պետք է ներկայացնի մինչև հոկտեմբերի 20-ը: Գործընթացը պետք է մեկնարկեր դեռ նախորդ շաբաթ, սակայն հետաձգվել էր, և դատավորներն ասել էին, թե այս պատերազմական իրավիճակում սիրտ չունեն այդպիսի հարցեր քննարկելու»:

Առավել մանրամասն՝ թերթի այսօրվա համարում: