The Hill. Քիմ Քարդաշյանը օգտագործում է իր ռեսուրսները` ՀՀ-ին աջակցության նպատակով ԱՄՆ-ի վրա ճնշում գործադրելու համար

Ռեալիթի շոուի աստղ եւ քրեական արդարադատության բարեփոխումների կողմնակից Քիմ Քարդաշյան Ուեսթը պնդում է, որպեսզի նախագահ Թրամփն ավելին անի Հայաստանին աջակցելու համար` ղարաբաղյան հակամարտության գոտում սրման ֆոնին, գրում է The Hill-ը:

«Հայկական ծագմամբ ազդեցիկ հայտնի անձը դիմում է իր հարյուր միլիոնավոր հետեւորդներին սոցիալական ցանցերում` պահանջելով, որպեսզի Կոնգրեսը դատապարտի Ադրբեջանին` որպես վերջին ռազմական գործողությունների հրահրող, իսկ Թուրքիային` հակամարտությանը միջամտելու համար:

Քարդաշյան Ուեսթը, ովն անմիջական կապի մեջ է Թրամփի փեսայի եւ ավագ խորհրդատու Զարեդ Քուշների հետ, կարող է վարչակազմին ավելի նախաձեռնողական դիրքորոշման դրդել: Նրա ջանքերի հետեւում կանգնած է Լոս Անջելեսից կինոպրոդյուսեր եւ մարդու իրավունքների պաշտպան Էրիկ Էսրաիլյանը, ով հայտարարություններ է նախապատրաստում Քարդաշյան Ուեսթի, նրա ընտանիքի հայտնի անդամների եւ հայկական ծագմամբ այլ հայտնի հայտնիների համար` կոչ անելով ավելի շատ աջակցել Երեւանին:

«Իրավիճակը, որը ներկայումս միջազգային պատշաճ ուշադրության չի արժանանում, հիասթափեցնում է շատերին»,- The Hill-ին ասել է Հայոց ցեղասպանության մասին պատմող «Խոստում» ֆիլմի պրոդյուսեր Էսրաիլյանը: «Այն, ինչ ես արեցի իմ ընկերների հետ, ինչպիսիք են Քիմ Քարդաշյանը, նրա ընտանիքի, նրա եղբայրների եւ քույրերի եւ մյուս ընկերների հետ, ինչպիսիք են Շերը, Սերժ Թանկյանը, Ալեքսիս Օհանյանը, մենք բոլորս... Ակնհայտ է, որ նրանք ավելի մեծ հարթակ ունեն, քան ես, բայց ես բոլորին համախմբելու ունակություն ունեմ...»:

Չնայած Թրամփը եւ վարչակազմի պաշտոնյաները կողմ են արտահայտվել անհապաղ հրադադարի ռեժիմի կոչ անող հայտարարություններին, իսկ Ազգային անվտանգության խորհրդի եւ Պետդեպարտամենտի պաշտոնյաները բանակցություններ են վարել Երեւանում եւ Բաքվում իրենց գործընկերների հետ, միջազգային հանրությունը հիմնականում կարծում է, որ ԱՄՆ-ն ջանք չի գործադրում տարածաշրջանում լարվածությունը հանդարտեցնելու համար: Եվրամիության արտաքին գործերի նախարար Ժոզեպ Բորելը չորեքշաբթի հայտարարել էր, որ «ամերիկացիները հեռանում են, իսկ Թուրքիան ավելի ուժեղ, շատ ավելի ագրեսիվ դիրք է գրավում»:

Ամերիկահայ համայնքը, որի թիվն ԱՄՆ-ում շուրջ 1.5 միլիոն է, ճնշման արշավ է սկսել, որպեսզի դրդի Կոնգրեսին աջակցություն ցույց տալ Հայաստանին: «Ես չէի խնդրի իմ բոլոր ընկերներին օգտագործել այն լեզուն, որը մենք օգտագործում էինք, եթե գոնե 1 տոկոս հավանականություն լիներ, որ Հայաստանն է սկսել այդ ռազմական գործողությունները»,- ասել է Էսրաիլյանը: Քարդաշյան Ուեսթը սոցիալական ցանցերում կատարած իր գրառումներից մեկում հասարակությանը կոչ է արել հորդորել Կոնգրեսին եւ Սպիտակ տանը ճնշում գործադրել Բաքվի վրա` ռազմական գործողությունները, ինչպես նաեւ ԱՄՆ ռազմական օգնությունն Ադրբեջանին դադարեցնելու համար, եւ նախազգուշացրել էր Թուրքիային դադարեցնել զենքի եւ զինյալների մատակարարումը Բաքվին: Քարդաշյան Ուեսթի դիրքորոշումն այս հարցում մեծ ազդեցություն ունի: Սեպտեմբերի 29-ին նա սոցիալական ցանցերում տարածել էր ANKA կայքի հղումը, ինչը գրեթե խափանել էր կայքի աշխատանքը: Մինչեւ հոկտեմբերի 1-ը կոնգրեսականները բանաձեւ են ներկայացրել, որով դատապարտում են Ադրբեջանին` ագրեսիվ ռազմական գործողությունների եւ Թուրքիայի միջամտության համար: Բանաձեւը ուղեկցվում էր պետքարտուղար Մայք Պոմպեոյին ուղղված նամակով, որում կոչ էր արվում ԱՄՆ ռազմական օգնությունը Բաքվին օգտագործել հրադադարի ռեժիմի հասնելու համար: Ժողովրդավարական սենատորներից Պոմպեոյին ուղղված առանձին նամակում կոչ էր արվում «բարձրագույն մակարդակի ներգրավվածություն» ցուցաբերել` հրադադարի ռեժիմին հասնելու եւ անվտանգության ոլորտում Ադրբեջանին ցանկացած օգնություն կասեցնելու համար:

Բրուքինգսի ինստիտուտի ավագ գիտաշխատող Ֆիոնա Հիլը կարծում է, որ «Միացյալ Նահանգներն անհայտ կորել են» Լեռնային արաբաղի հարցում եւ նախազգուշացրել է, որ Քարդաշյան Ուեսթի բարձրաձայն ելույթները կարող են հետագայում վարկաբեկել ԱՄՆ-ի` որպես միջնորդի պատմական դերը: «Հաշվի առնելով մեծաթիվ հայկական սփյուռքը եւ նախագահի անձնական հարաբերությունները Քիմ Քարդաշյանի հետ` այնքան էլ լավ չէ չեզոք դեր խաղալ, որը մենք նախկինում խաղում էինք»,- ասել է նա: Քարդաշյան Ուեսթի հարաբերությունները Թրամփի եւ Քուշների հետ սկիզբ են առել 2018 թվականին, երբ նա հաջողությամբ լոբբիստական ​​գործունեություն էր ծավալում նախագահի օգտին, որպեսզի Թրամփը մեղմացնի Ալիս Զոնսոնի պատժաչափը, ով ցմահ ազատազրկման էր դատապարտվել թմրանյութերի հետ կապված ոչ բռնի հանցագործության համար:

Զոնսոնին ազատելու փորձերը եւ ուղիղ հեռախոսազրույցները Քուշների հետ փաստագրվել էին նրա ռեալիթի շոուում: Ավելի ուշ Քարդաշյան Ուեսթը եւ Զոնսոնը նախագահի հետ աշխատում էին քրեական արդարադատության բարեփոխումների ուղղությամբ եւ որպես վարչակազմի ջանքերի խոսնակներ էին հանդես գալիս: Թրամփը գովազդում էր իր քայլերը աֆրոամերիկացի ընտրողներին ուղղված ուղերձում: Պարզ չէ` արդյո՞ք Քարդաշյան Ուեսթը վերջին շրջնում անմիջական կապի մեջ է Սպիտակ տան հետ Հայաստանի եւ Ադրբեջանի հարցով: Քարդաշյան Ուեսթի խոսնակ Քրիստի Ուելդերն հայտարարել է, որ աստղը շարունակելու է գրառումներ անել սոցցանցերում Հայաստանում ստեղծված իրավիճակի վերաբերյալ:

Դեկտեմբերին նա դիմել էր իր միլիոնավոր բաժանորդներին` հորդորելով սատարել Հայոց ցեղասպանությունը ճանաչող Սենատի բանաձեւին, որը հետագայում ընդունվեց միաձայն:

Էսրաիլյանը, ով նույնպես մասնակցում էր բանաձեւը ընդունելու նպատակով Կոնգրեսի վրա ճնշում գործադրելու ջանքերին, ասել է, որ գիտի, որ «Սպիտակ տունը զբաղված է», երբ նրան հարցրեցին, թե ինչպես է նա վերաբերվում ԱՄՆ մասնակցությանը Լեռնային Ղարաբաղի խնդրի լուծմանը: «Համոզված եմ, որ սա Սպիտակ տան ամենամեծ գերակայություններից չէ, սակայն իրականում սա սայթաքուն ուղի է»,- ասել է նա` մատնանշելով ադրբեջանական զորքերի կողմից մարդու իրավունքների խախտումների մասին հաղորդագրությունները: