Թուրք-կիպրոսյան իշխանությունները հսկիչ անցակետ են տեղակայել Վարոշայի մուտքի մոտ

Երեկ՝ չորեքշաբթի, թուրք-կիպրոսյան իշխանությունները սկսել են Կիպրոսի բուֆերային գոտում գտնվող եւ վերջին 46 տարում փակ Ֆամագուստա քաղաքի հանգստավայրային շրջան Վարոշա մուտք գործելու ապահովման ենթակառուցվածքների ստեղծումը, հայտնել է Kibris Postasi պարբերականը։ Երեքշաբթի Հյուսիսային Կիպրոսի Թուրքական Հանրապետության վարչապետ Էրսին Թաթարը հայտարարել էր, որ 1974 թվականից ի վեր առաջին անգամ Վարոշա մուտքը կթույլատրվի հինգշաբթիից՝ հոկտեմբերի 8-ից, այս «ուրվական քաղաք» մուտքի հսկիչ անցակետը տեղակայվել է չորեքշաբթի։

Kibris Postasi-ն համացանցում տեսանյութ է հրապարակել, որտեղ պատկերված է Վարոշայի ափին կռունկով հսկիչ անցակետի պահատնակի տեղադրումը։ 46 տարում առաջին անգամ զբոսաշրջիկները հենց այս անցակետով են Վարոշայի ծովամերձ գոտի անցնելու։ Թուրք-կիպրոսյան Bayrak հեռուստառադիոհեռարձակման կորպորացիան հայտնել է, որ այս անցակետով մարդիկ կարող են սկսել անցնել կիպրոսյան ամառային ժամանակով 11:00-ից։

Մինչեւ 1974 թվականը Ֆամագուստան համարվում էր կիպրոսյան գլխավոր հանգստավայրը, որն անվանում էին «միջերկրածովյան Լաս Վեգաս», բայց նշված թվականի իրադարձություններից հետո, երբ Կիպրոսում տեղի ունեցած ռազմական հեղաշրջումից հետո այնտեղ ներխուժեց Թուրքիայի բանակը, քաղաքի հիմնական հանգստավայրային շրջան Վարոշան փակվեց։ Ֆամագուստան գրավեցին թուրքական զորքերը, իսկ հունական համայնքի ներկայացուցիչներին կարգադրեցին մեկ օրվա ընթացքում քաղաքից հեռանալ։ Ավելի ուշ ՄԱԿ ԱԽ ընդունած բանաձեւով արգելվում էր Վարոշայում դատարկ տների եւ բնակարանների բնակեցումը որեւէ մեկի կողմից, բացի նրա բուն բնակիչներից։ Չնայած հանգստավայրն անվանապես կղզու՝ ՄԱԿ-ի վերահսկողության տակ գտնվող գոտում էր, Վարոշան դե ֆակտո հայտնվել էր թուրքական զորքերի վերահսկողության տակ։

Երեքշաբթի Թուրքիայի նախագահ Ռեջեփ Թայիփ Էրդողանն ի պատասխան Թաթարի հաղորդագրության՝ Վարոշա թաղամասի ափի հասանելիությունը հոկտեմբերի 8-ին վերականգնելու ծրագրերի մասին, հայտարարել էր, որ Անկարան պատրաստ է Հյուսիսային Կիպրոսի իշխանություններին այս հարցում ցույց տալ ցանկացած աջակցություն։

Չորեքշաբթի ՌԴ ԱԳՆ տարածած մեկնաբանության մեջ շեշտվում էր, որ Ռուսաստանն անթույլատրելի է համարում Վարոշայի ափը բացելու վերաբերյալ որոշումը։ Արտաքին քաղաքականության գերատեսչությունից նշել էին, որ ՄԱԿ Անվտանգության խորհրդի ավելի վաղ ընդունած բանաձեւերը խախտող միակողմանի գործողությունները լրացուցիչ դժվարություններ են ստեղծում կիպրոսյան հիմնախնդրով բանակցային գործընթացը վերսկսելու համար։ Սմոլենսկի հրապարակից նշել էին, որ կիպրոսյան հիմնախնդրի վերջնական կարգավորման շուրջ բանակցությունների արագ վերագործարկումը թույլ կտար ստեղծել կառուցողական մթնոլորտ, որը կնպաստեր փոխզիջում գտնելուն, այդ թվում՝ Վարոշայի հարցում։