Կրեմլից հայտնել են Ղարաբաղի վերաբերյալ Ադրբեջանի եւ Թուրքիայի հետ երկխոսության մասին

Ռուսաստանը Լեռնային Ղարաբաղի հակամարտության թեմայով ո՛չ Ադրբեջանի, ո՛չ Թուրքիայի հետ աշխատանքային շփումների դեֆիցիտ չունի, մշտապես երկխոսություն է իրականացվում նաեւ բարձր մակարդակով, իսկ հեռախոսային շփումները կախված են նրանց աշխատանքային ժամանակացույցից եւ նպատակահարմարությունից, լրագրողներին ասել է ՌԴ նախագահի մամուլի քարտուղար Դմիտրի Պեսկովը, փոխանցում է «ՌԻԱ Նովոստի»-ն։

«Դա կախված է նախագահների աշխատանքային ժամանակացույցից եւ նպատակահարմարությունից։ Գիտեք, որ դա ամենեւին չի նշանակում, որ ռուսական կողմը աշխատանքային շփումների որեւիցե դեֆիցիտ ունի»,- հայտարարել է Պեսկովը՝ պատասխանելով այն հարցին, թե ինչո՞ւ ՌԴ նախագահ Վլադիմիր Պուտինը Ղարաբաղում հակամարտության սկզբից 3 անգամ խոսել է Հայաստանի վարչապետ Նիկոլ Փաշինյանի հետ, բայց ոչ մի անգամ Թուրքիայի եւ Ադրբեջանի նախագահներ Թայիփ Էրդողանի եւ Իլհամ Ալիեւի հետ։

Կրեմլի ներկայացուցիչն ընդգծել է, որ ՌԴ ԱԳ նախարար Սերգեյ Լավրովը մշտական շփման մեջ է թե՛ Ադրբեջանի, թե՛ Թուրքաիայի իր գործընկերների հետ։

«Այս պատճառով ղարաբաղյան հակամարտության թեմայով ռուս-թուրքական եւ ռուս-ադրբեջանական, ինչպես նաեւ ռուս-հայկական երկխոսությունն իրականացվում է բարձր մակարդակով եւ մշտապես»,- հայտարարել է ՌԴ նախագահի մամուլի քարտուղարը։