Ադրբեջանը սկսում է եռալ ներսից. Էրդողանը արդեն ոչ թե վստահ է, այլ հույս ունի

Հույս ունեմ, որ ադրբեջանական բանակը կշարունակի հարձակվել, մինչև իր տարածքների ազատագրումը, հայտարարել է Թուրքիայի նախագահ Էրդողանը, ինչպես հայտնում է ռուսական «ՌԻԱ Նովոստին»: Էրդողանի հայտարարությունը բավականին ուշագրավ է, որովհետև դրա տոնայնությունը թույլ է տալիս առնվազն անել որոշակի հարցադրումներ, թե ինչու է Էրդողանը ոչ թե վստահ, այլ ընդամենը հույս ունի, որ ադրբեջանական բանակը կշարունակի հարձակվել, գրում է 1in.am-ը:

Իհարկե, այդ հարցադրման պատասխանն էլ իր հերթին արդեն մի քանի օր շարունակ տալիս է հայկական բանակը՝ թուրք-ադրբեջանական ահաբեկչական հիբրիդային գրոհին հասցրած իր պատասխան հարվածներով: Հայկական զինուժի պատերին է բախվել մի ռազմա-ահաբեկչական մեքենա, որին թվում էր, թե ընդամենը օրերի ընթացքում Երևանին պարտադրելու են իրենց պայմանները: Իրավիճակը, սակայն, շրջվել է գլխիվայր, և հիմա Թուրքիան և Ադրբեջանն ըստ ամենայնի հայտնվել են կրակի դադարեցման հարմար պայմանների փնտրտուքի անհրաժեշտության առաջ: Բայց, թերևս, ոչ միայն:

Բանն այն է, որ չնայած Ադրբեջանի կազմակերպած ներադրբեջանական տեղեկատվական բլոկադային, այդուհանդերձ դուրս են գալիս տեղեկությունները Ադրբեջանի տարբեր քաղաքներում ազգային փոքրամասնությունների ընդվզումների, ինչպես նաև բնակչության խուճապի մասին: Այլ կերպ ասած, Ադրբեջանը սկսում է եռալ ներսից: Իսկ թե ինչ է դա նշանակում արհեստական կազմավորման համար, որը ստեղծվել է մեկ դար առաջ ձևավորված աշխարհաքաղաքական միջավայրի և հարաբերակցության արդյունքում, իսկ այժմ հայտնվել գործնականում բոլորովին նոր միջավայրում և վերածվել դրա «օտար մարմնի», լավ գիտեն, թերևս, հենց Ադրբեջանի ներկայումս իշխող ընտանիքի անդամները: Չէ՞ որ նրանք այդ կարգավիճակում են հայտնվել հենց այն եռքի արդյունքում, որ հայկական բանակի հարվածներին զուգահեռ սկսվել էր Ադրբեջանում մոտ 30 տարի առաջ: Այդ պայմաններում, իսկապես, ադրբեջանական բանակը ստիպված է լինելու ոչ թե հարձակվել, այլ պաշտպանվել, արդեն ոչ միայն հայկական հարվածներից, այլ Ադրբեջանում սկսած եռքից: