Եվրոպայի չեմպիոն Արսեն Հարությունյանը՝ Արցախից․ Հաղթանակը մերն է լինելու

Ազատ ոճի ըմբշամարտի Եվրոպայի չեմպիոն Արսեն Հարությունյանը «Հայդուկ» կամավորական ջոկատի հետ մեկնել է Արցախ: Տեղեկությունը NEWS.am Sport-ի թղթակցի հետ զրույցում հաստատել է 20-ամյա ըմբիշը:

«Արդեն մի քանի օր է՝ սպասում էի, որ հայրիկիս հետ մեկնեմ առաջնագիծ: Ես միացել եմ «Հայդուկ» կամավորական ջոկատին, որի հրամանատարներն են հայրիկս՝ Կարեն Հարությունյանը եւ Կարեն Ռաշոյանը: Մեր ջոկատի կազմում է նաեւ Մասիսի հրամանատար Սայադ Հայրապետյանը:

«Հայդուկ» ջոկատը ձեւավորվել է 2016 թվականի քառօրյա պատերազմի ժամանակ Համոյի եւ Սայադի ջանքերով: Ինձ թույլ չէին տալիս, որ ես մեկնեի նրանց հետ, բայց ես ամեն ինչ արեցի, որ ես էլ գնամ եւ մեր զինվորների կողքին լինեմ:

Հաղթանակը մերն է լինելու: Ամեն ինչ անելու ենք, որ հաղթենք: Աստված պահապան մեզ բոլորիս: Հաղթանակով հետ ենք գալու»,- ասել է Արսեն Հարությունյանը:

Հիշեցնենք, որ սեպտեմբերի 27-ին Ադրբեջանի զինված ուժերը, կոպտորեն խախտելով միջազգային մարդասիրական իրավունքի գործող նորմերը եւ հակամարտության լուծման խաղաղ բանակցային գործընթացի տրամաբանությունը, օգտագործելով հրթիռահրետանային միջոցներ եւ ավիացիա, շփման գծի ամբողջ երկայնքով անցել են հարձակման՝ թիրախավորելով Արցախի ՊԲ մարտական դիրքերը եւ խաղաղ բնակավայրերը, այդ թվում՝ մայրաքաղաք Ստեփանակերտը: Մարտերը շարունակվում են:

Լուսինե Շահբազյան