Արցախցին չի ուզում լքել իր տունը. ինքնահռչակ կոչերին պետք է վերջ տալ. «Ժողովուրդ»

«Ժողովուրդ» թերթը գրում է.

«Արդեն երկու օր է՝ Հայաստանում հայտնի դառնալու նոր թրենդ է ձևավորվել։ Մարդիկ համացանցի կամ տեղեկատվական այլ հարթակների միջոցով հայտարարում են, թե պատրաստ են ապաստան տրամադրել Արցախի մեր եղբայրներին, քույրերին, երեխաներին։ Առաջին հայացքից հումանիստական այս քայլը ողջունելի է և գովելի, բայց ռազմական դրության պայմաններում պետությունը, տվյալ դեպքում՝ Արցախը, խնդիր չի դրել իր առջև էվակուացնել խաղաղ բնակիչներին։ Հետևաբար խաղաղ բնակչության համար որևէ մեկի տանն ապաստան տալու առաջարկը ոչ այլ ինչ է, քան ինքնիրավչություն։ Հայտնի ճշմարտություն կա պատերազմական իրողություններում, որ զինվորի թիկունքն ամուր է պահում բնակչությունը, հետևաբար Արցախը դատարկելու ինքնահռչակ կոչերը միանշանակ անընդունելի են։

Իրավիճակն այնքան է վերածվել PR ակցիայի, որ ստիպված եղավ գործին խառնվել ՀՀ ԱԱԾ-ն և հայտարարել. «ԱԱԾ-ն հորդորում է հետասյու զերծ մնալ նմանատիպ հրապարակումներ կատարելուց, քանի որ հակառակորդը դրանք կարող է օգտագործել ապատեղեկատվական սադրանքներ իրականացնելու համար»։ Հուսանք՝ գոնե այս հայտարարությունը կսթափեցնի հատկապես պետական պաշտոնյաներին և իրենց բարերար հռչակած մանր ու միջին գործարարներին։ Արցախցին չի ուզում լքել իր տունը, և բոլորս լավ հասկացանք, որ Արցախից մարդիկ չեն ցանկանում մեկ սանտիմետր անգամ հեռանալ։ Նույնիսկ հղի կանայք են հրաժարվում օգտվել Արցախից դուրս գտնվող որևէ հիվանդանոցում»։

Առավել մանրամասն՝ թերթի այսօրվա համարում: