Հրանտ Դինքի մրցանակը շնորհվել է Օսման Քավալային և Մոզն Հասանին

Հրանտ Դինքի 12-րդ միջազգային մրցանակը շնորհվել է բանտարկված թուրք բարեգործ Օսման Քավալային եւ Եգիպտոսից կանանց իրավունքների պաշտպան Մոզն Հասանին։

«Ինձ համար մեծ պատիվ է լինել մեծ թվով ֆեմինիստներից մեկը, որն այս պարգեւը ստացել է կանանց եւ այլ խոցելի խմբերի նկատմամբ խտրականության բոլոր ձեւերի դեմ իմ պայքարի համար»,- ասել է Մոզն Հասանը իր շնորհակալական խոսքում։

Օսման Քավալան բանտից իր նամակում շեշտել է խաղաղության կառուցման համար միջմշակութային երկխոսության կարեւորությունը․ «Ես կարծում եմ, որ հանրության տարբեր շերտերի եւ տարբեր երկրներում բնակվողների միջեւ նախապաշարմունքները կարելի է հաղթահարել՝ օգտագործելով ողջամտությունը, շփվելով եւ ականջալուր լինելով»։

Այս տարի ժյուրիի կազմում էին՝ կանանց իրավունքների պաշտպան Նեբահաթ Աքոչը եւ շրջակա միջավայրի պաշտպանության ակտիվիստ Ագնես Հարսինգը, ռեժիսոր Էմին Ալփերը, գրող Թանիլ Բորան, իրավաբան Սեզար Ռոդրիգես Գարավիտոն, ռեժիսոր Ռոբեր Կետիկյանը, իրավաբան Վիվիանա Կրստիչեւիչը, երեխաների իրավունքների հարցերով ակտիվիստ Մոլի Մելչինգը, գրող, դիվանագետ Շաֆաք Փավեյը, քաղաքագետ Ֆյուսուն Ուսթելը եւ Հրանտ Դինք հիմնադրամի նախագահ Ռաքել Դինքը։

Ռաքել Դինքը արարողության ժամանակ կատարել է ամուսնու՝ Հրանտ Դինքի սիրելի երգերից մեկը՝ «Ես բլբուլ եմ»։