«Ղումարով» ընտրված գործկոմ կլիներ, եթե պայմանավորված խաղերի մեջ կասկածվող ակումբները մնային. ՀՖՖ գործկոմի անդամ

Հայկական ֆուտբոլի պատմության մեջ առաջին անգամ հավաքվել է բացառապես ֆուտբոլային գործկոմ: ՀՖՖ-ին ոչ լեգիտիմ ընտրություններ անցկացնելու մեջ մեղադրելը անիմաստ ու անշնորհակալ զբաղմունք է: Այդ մասին NEWS.am Sport-ի թղթակցի հետ զրույցում ասաց Հայաստանի ֆուտբոլի ֆեդերացիայի գործադիր կոմիտեի անդամ Կարեն Շաբոյանը:

Վերջին օրերին ՀՖՖ գործկոմի կազմը լքեցին մրցավարական կոմիտեի նախագահ Տիգրան Հակոբյանը ու «Սևան» ակումբի նորընտիր փոխնախագահ, Հայաստանի հավաքականի նախկին ֆուտբոլիստ Արմեն Շահգելդյանը: Պայմանավորված խաղերի դեմ պայքարող կոմիտեի անդամ Տիգրան Հակոբյանն իր որոշումը բացատրել էր պայմանավորված հանդիպումների սկանդալով:

Ի դեպ, NEWS.am Sport-ի հարցմանն ի պատասխան, ՀՖՖ-ից հայտնեցին, որ դեռ չեն ստացել ՀՖՖ գործկոմի կազմը լքելու վերաբերյալ որևէ դիմում:

Վանաձորի «Լոռիի» հիմնադիր ու նախագահ, ՀՖՖ գործադիր կոմիտեում մոտ 20 տարի աշխատած Թովմաս Գրիգորյանը NEWS.am Sport-ի թղթակից հետ զրույցում ողջունել էր Տիգրան Հակոբյանի և Արմեն Շահգելդյանի քայլը՝ նշելով նաև, որ կան կասկածներ, որ այդ «ղումարն» ունի իր գործուղած անդամները ՀՖՖ գործկոմում, որը, ըստ նրա, բավականաչափ ուժեղ չէ:

Կարեն Շաբոյանի խոսքով՝ Հայաստանի ֆուտբոլի ֆեդերացիան երբևէ չի ունեցել այսպիսի ֆուտբոլային գործկոմ, որին ուղղված մեղադրանքներն անընդունելի են:

«Հիմա ստեղծվել է այնպիսի իրավիճակ, որ ով, ինչ ուզում, խոսում է: Իրականում, պետք է յուրաքանչյուր ասածը լինի հիմնավորված և ունենա իրավական մինիմալ հիմնավորումներ: Ասում են՝ ոչ լեգիտիմ գործկոմ, «ղումարի» հետ կապ ունեցող գործկոմ, բայց դրանք միայն անհիմն խոսակցություններ են: Իրականում, դա այդպես չէ: Նույն ՀՖՖ-ի ընտրությունները, որոնց մասնակցեց նաև Թովմաս Գրիգորյանը, եղել են առավելագույնս լեգիտիմ, ֆեդերացիայի պատմության մեջ առաջին անգամ եղել են 2 թեկնածուով իրական ընտրություններ, թափանցիկ՝ բոլոր լրագրողների ներկայությամբ: Բացի այդ, ընտրություններից առաջ տեղի ունեցավ այսպես ասած ՀՖՖ անդամ «ֆեյք» ու չգործող կազմակերպությունների կասեցում: Նույնիսկ կասեցվեց ՀՖՖ-ին 100 տոկոս բաժնեմասով պատկանող «Վազգեն Սարգսյանի մարզադաշտի» գործունեությունը, քանի որ կար շահերի բախման կամ ֆուտբոլային գործունեության հետ կապված կասկած: ՀՖՖ նախագահի ու գործկոմի՝ նման թափանցիկ ու բաց ընտրություններ երբեք չեն եղել: Դրանից հետո վարկաբեկել այդ ընտրությունները և ասել, որ դրանք եղել են կեղծ ու ոչ լեգիտիմ, կարծում եմ՝ անիմաստ ու անշնորհակալ զբաղմունք է:

«Ղումարով» ընտրված գործկոմ կլիներ այն պարագայում, եթե պայմանավորված խաղերի մեջ կասկածվող ակումբները մնային և շարունակեին իրենց գործունեությունը: Այդ դեպքում կստացվեր, որ այս գործկոմը պաշտպանում է այդ ակումբներին և չի ցանկանում կասեցնել նրանց գործունեությունը, քանի որ ընտրվել է նաև նրանց միջոցով:

Իրականությունն այն է, որ պատմության մեջ առաջին անգամ ստեղծվել է պայմանավորված խաղերի դեմ գործող կոմիտե, որն իրականացրել է մեծածավալ աշխատանք, վերլուծությունների արդյունքում հայտնաբերել է այդ խաղերը և դրանց հիման վրա, հավաստիանալով ու համադրելով բոլոր օպերատիվ տեղեկատվությունները, այդ թվում՝ Ինտերպոլից ու միջազգային կառույցներից ստացված, կայացրել է որոշում, որին բոլորը ծանոթ են: Այսինքն՝ այս գործկոմը գործել ու կասեցրել է այդ «ղումարը»: Եվ այդպիսի հայտարարություններ անելիս պետք է գալ տրամաբանական ուղիով, այլ ոչ թե ասել այն, ինչը հիմնավորում չունի»,- նշեց Կարեն Շաբոյանը:

Առավել մանրամասն՝ սկզբնաղբյուրում: