Հաջողություն. Եթե ուզում եք հասնել Ձեր նպատակին, ապա...
Մի անգամ twitter միկրոբլոգում մի կնոջ գրառում տեսա, որտեղ նշվում էր միայն ու միայն հաջողության մասին: Ես նրան գրեցի, որ իհարկե անընդհատ նույն կերպ եմ մտածում, բայց ինչ – որ բան պակասում է մեծ նվաճումների հասնելու համար: Նա ինձ պատասխանեց' օք, տվեք Ձեր էլեկտրոնային հասցեն, որը ես սիրով տվեցի: Այնուհետև մի որոշ ժամանակ անց ստացա պատասխան, որը մի պատմություն էր: Ահա այն հիմա ես կներկայացնեմ, կարծում եմ կհետաքրքրի նաև Ձեզ' սիրելի ընթերցող:
Image
Մի իմաստուն մարդ իր աշակերտի հետ քայլում էր և զրուցում: Հանկարծ նրանք հասան մի շատ աղքատ վայր և հեռվում երևաց փոքրիկ խրճիթ: Խրճիթի դիմաց վազվզում էին 5 երեխաներ, որոնք կիսապատռված հագուստով էին ու ոտաբոբիկ: Իմաստուն մարդը մոտեցավ տանտիրոջն ու հարցրեց, թե ինչպես է նա կարողանում պահել իր ընտանիքն այս աղքատ տեղամասում, որտեղ չկար ոչ մի աշխատատեղ: Տանտերը պատասխանեց, որ հեռվում երևացող կովն իրենցն է, որի կաթի մի մասը վաճառում է և այդպես պահում է իր ընտանիքը: Դա իրենց հույսն է և ապրուստի միակ աղբյուրը:
Իմաստուն մարդը շնորհակալություն հայտնեց տանտիրոջն իր անկեղծության համար և շարունակեց իր ճանապարհը: Երբ նրանք ահագին հեռացան, իմաստունն իր աշակերտին հանձնարարեց, որ նա գնա և այդ կովին նետի դեպի անդունդը: Աշակերտը այլայլվել էր, նա փորձում էր իր ուսուցչին համոզել, որ դա շատ մեծ սխալ է, քանի որ դրանով կոչնչացնեն այդ աղքատ ընտանիքին: Իմաստունը լսեց աշակերտի բոլոր խոսքերը և ասաց, որ կատարիր այն, ինչ ես ասում եմ: Աշակերտը կատարեց իմաստունի առաջադրանքը, բայց այդ պահը նրա ուղեղից չէր կարողանում դուրս գալ: Նա այդպես էլ չկարողացավ մոռանալ այդ դեպքը:
Այս միտքը նրան երկար էր տանջում: Շատ տարիներ հետո նա վերադարձավ, որպեսզի օգնի այդ ընտանիքին, քանի որ հնարավոր է նրանց դժբախտության պատճառն ինքն է եղել: Երբ նա մոտեցավ այդ տարածքին, տեսավ, որ ամեն ինչ փոխվել է: Նա մտածում էր, որ այդ ընտանիքը ստիպված էր լքել այդ տունը կովին կորցնելուց հետո: Սակայն ի զարմանս իր մտածածի' նա տեսավ մի հիանալի շքեղ տուն և տան դիմաց կանգնած մի ծանոթ մարդ: Նա սկսեց հարցուփորձ անել աղքատ ընտանիքի մասին, որոնք այստեղ էին ապրում: Այդ մարդը ժպտաց ու պատասխանեց, որ մի քանի տարի առաջ նրանց կովը անհայտացավ անսպասելիորեն, որից հետո իրենց պարզապես ցնցված էին:
Արդյունքում անհրաժեշտ էր գտնել նոր ուղիներ ապրելու համար: Այդ մարդը խոստովանեց, որ կովի կորուստն իր կյանքի ամենահաջողակ պահն էր եղել: Խնդիրը նրանում էր, որ մենք, ունենալով կով, մտածում էինք առանց նրա կյանք չկա և կախված էինք նրանից: Մենք պարզապես չէինք էլ կարող պատկերացնել, թե ինչպես պետք է ապրեինք առանց նրա: Իսկ ահա նրան կորցնելով' ես մտածում էի այլ ուղիների մասին, որպեսզի կարողանայի ապրուստ վաստակել իմ ընտանիքը պահելու համար: Արդյունքում Դուք տեսնում եք այն, ինչ ես ունեմ արդեն:
Հ.Գ. Կյանքում մեծ բարձունքի հասնելու համար հարկավոր է որոշ զոհողությունների գնալ: Ու եթե մենք կյանքում կախվում ենք որոշ իրերից կամ ինչ-որ աշխատանքից, դա մեզ որոշ չափով տալիս է ապահովության զգացում և չի թողնում ավելիին հասնել: Ուստի նախ և առաջ հարկավոր է այրել բոլոր կամուրջները, որպեսզի նահանջի այլընտրանք չլինի և միայն առաջ: Ահա այս տողերն են հանդիսանում հաջողության գրավականներից մեկը' կենտրոնացում մեկ կարևոր նպատակի վրա, այլ ոչ թե բավարարում ու գոյատևում' կառչելով շատ չնչին բաներից: