Սերբիայում կալանավորվել է Ադրբեջանի դեսպանը

Ադրբեջանի պետական անվտանգության ծառայությունը հայտնել է Սերբիայում եւ Բոսնիա Հերցեգովինայում երկրի դեսպան Էլդար Հասանովի կալանավորման մասին, հայտնում է Turan-ը:

Պետական անվտանգության ծառայության զեկույցում ասվում է, որ նա ներգրավված է եղել երկրի արտաքին գործերի նախարարության հյուպատոսական վարչությունում ավելի վաղ հայտնաբերված յուրացումներում:

«Այս քրեական գործի քննության ընթացքում ն արտաքին քաղաքական գործունեության համար հատկացված պետական միջոցների յուրացման վերաբերյալ նոր փաստեր են հայտնաբերվել: Համակարգված ֆինանսական աուդիտի ընթացքում պարզվել է, որ Սերբիայում, Բոսնիայում եւ Հերցեգովինայում եւ Մոնտենեգրոյում երկրի դեսպան Էլդար Հասանովը կատարել է զգալի ֆինանսական եւ այլ խախտումներ: Այս գործի շրջանակներում Էլդար Հասանովը ձերբակալվել է»,- ասվում է հաղորդագրությունում։

Նշենք, որ Էլդար Հասանովը Ադրբեջանի նախկին գլխավոր դատախազն է: Նա մեկ օր առաջ ժամանել էր Բաքու եւ մասնակցել Ադրբեջանի եւ Սերբիայի Անվտանգության խորհուրդների ղեկավարների բանակցություններին:

Ըստ ամենայնի, առաջիկայում դատարանը որոշում կկայացնի նրա ձերբակալության մասին, եւ նա հետ կկանչվի դեսպանի պաշտոնից:

Պետք է ենթադրել, որ դիվանագիտական կարիերայի ողբերգական շրջադարձը կապված է այն սկանդալի հետ, որը Բաքուն փորձում է սանձազերծել Սերբիայի հետ հարաբերություններում: Հիշեցնենք, որ Բաքուն բողոք էր ներկայացրել Բելգրադին՝ Հայաստանին զենքի լիովին օրինական վաճառքի վերաբերյալ: Սերբիայի իշխանությունները նրբանկատորեն արձագանքել էին ադրբեջանական կողմին: Բանը հասել էր նրան, որ նախագահ Ալիեւի մամուլի ծառայությունը դիմել էր բացահայտ ստի՝ աղավաղելով Սերբիայի նախագահ Ալեքսանդր Վուչիչի հայտարարությունները: