на Русском
ՆԳ նախարարն ընդունել է ԵՄ պատվիրակության ղեկա... 
Մանասյանն ընդունել է Equal Right Trust հիմնադ... 
Հակառակորդը պահպանում է այնպիսի ներուժ, որով կկարողանա մեծ ծավալով սադրանքներ իրականացնել. Արծրուն Հովհաննիսյան
Մենք անհրաժեշտ խորությամբ և ծավալով տեսնում ենք հակառակորդի գործողությունները: Այս մասին այսօր` հուլիսի 18-ին, լրագրողների հետ հանդիպմանն ասաց Իջեւանում լրատվական ճգնաժամային կենտրոնի պատասխանատու Արծրուն Հովհաննիսյանը, ով սակայն մանրամասներ չհայտնեց թշնամական ուժերի տեղաշարժի և մեր հետախուզության կատարած աշխատանքների մասին:
«Արդյո՞ք հակառակորդը պահպանում է այնպիսի ներուժ, որով կարողանա մեծ ծավալով սադրանքներ իրականացնել, այո պահպանում է: Մենք էլ դա տեսնում ենք, գործողությունները մեզ համար շատ պարզ են: Եթե կդիմեն ոտնձգությունների ու սադրանքների, կստանան արժանի հակահարված»,-նշեց նա:
Հակառակորդի գործողություններն անհրաժեշտ խորությամբ ու ծավալով տեսնում ենք: Ճիշտ է կրակոցները կամ հրետակոծությունները գրեթե դադարել են, բայց տեղեկատվական տիրույթում շարունակվում են ամենատարբեր ապատեղեկատվությունները, ամենատարբեր կեղծ հաշիվներից՝ խուճապի տարածում, գնահատականներ եւ այլն, նշում է Արծրուն Հովհաննիսյանը:
«Ես նորից հորդորում եմ զերծ մնալ գնահատականներ տալուց: Հատկապես նկատում եմ, որ ընդհանրացնող եզրակացություններ ենք շատ տալիս, թե ինչ տեղի ունեցավ, ինչպես տեղի ունեցավ, ինչ վերցրինք, ինչ կորցրինք, ով հաղթեց, ով պարտվեց: Հարգելիներս, դրա ժամանակը չի, վաղ է դրա մասին խոսելը, սպասենք պաշտոնական տեղեկությունների եւ չտանք այդպիսի մեկնաբանություններ»,-ասաց նա:
Արծրուն Հովհաննիսյանի կարծիքով՝ ադրբեջանական «փառապանծ» բանակը, որի մասին շատ է սիրում խոսել իրենց նախագահը, ըստ էության, ցույց տվեց, որ իրենց զորատեսակներից ոչ մեկը բարձր մարտունակություն եւ արդյունավետություն ցույց չի դրսևորել, անգամ «ամենափառապանծ» հատուկ նշանակության զորքերը:
«Տակը մնում են ԱԹՍ-ները, որոնք շատ թանկ են: Դրանք հիմնականում ձեռք են բերվում Իսրայելից, և այդ գումարները կտրվում են ադրբեջանցի ժողովրդի չափաբաժնից»,-ասաց նա:
Արծրուն Հովհաննիյանը նշեց, որ առավոտյան ռուսական մամուլից է իմացել, որ իսրայելական մասնագետներ են ժամանել Բաքու: «Թուրքիայից տրանսպորտային ինքնաթիռ եկավ, այսօր էլ մարզիչների ժամանումը Ադրբեջան: Տեսնենք, դրան անպայման կանդրադառնանք»:
Անդրադառնալով Ադրբեջանի զինուժի կողմից հայկական բնակավայրերի հրետակոծությանը, Արծրուն Հովհաննիսյանն ասաց. «Այո, պատերազմական հանցագործությունների մասին հարցը պետք է բարձրացվի ամենաբարձր մակարդակով: Եթե չեմ սխալվում, մենք այսօր արտասահմանյան լրագրողների այց կունենանք: ԱԳՆ-ն աշխատում է այս ուղղությամբ»:
