Պարզվել է «Մեգամոլ»-ի դիմաց վրաերթի հետևանքով մահացածի և վիրավորի ինքնությունը. նրանք ամուսիններ են (Լուսանկար)

Հայտնի է դարձել հուլիսի 3-ին Երևանում վրաերթի հետևանքով հիվանդանոց տեղափոխվելու ճանապարհին մահացածի և վիրավորի ինքնությունը:

Shamshyan.com-ի հաղորդմամբ, պարզվել է, որ մահացածը Երևան քաղաքի Բակունցի 2-րց նրբանցքի բնակիչ, 41-ամյա Արթուր Շադինյանն էր, իսկ վիրավորը նույն հասցեի բնակիչ, Սյուզաննա Հ.-ն է:

Աղբյուրի տեղեկություններով, մահացածը վիրավորի ամուսինն էր: Պարզվել է, որ վարորդ Ա. Ավետիսյանը աշխատում է Երևանում գործող ՍՊԸ-ներից մեկում:

Ավելի վաղ հայտնել էինք, որ հուլիսի 3-ին Երևանում, ժամը 22:15-ի սահմաններում Երևանի բնակիչ, 32-ամյա Աշոտ Ավետիսյանը իր վարած Nissan մակնիշի 69 AV 669 համարանիշի ավտոմեքենայով Գայի պողոտայում՝ «Մեգամոլ» առևտրի կենտրոնի հարևանությամբ, վրաերթի էր ենթարկել փողոցը չթույլատրելի հատվածով անցնող 2 հետիոտնի: Վարորդը փախուստի չէր դիմել, ահազանգել էր Երևանի 1-03 շտապօգնություն, և օպերատիվորեն դեպքի վայր ժամանած շտապօգնության բժիշկները վրաերթի ենթարկվածներին ծայրահեղ ծանր ախտորոշմամբ տեղափոխել էին թիվ 1 համալսարանական հիվանդանոց:

Վարորդը տեղում ենթարկվել էր սթափության փորձաքննության. պարզվել էր, որ նա եղել էր սթափ: Ավտոմեքենան հետաքննիչի հանձնարարականով տեղափոխվել էր Երևանի ՃՈ պահպանվող հատուկ տարածք: Դեպքի վայրում հավաքվածներն ասել էին, որ վրաերթի ենթարկվածները ամուսիններ են: