Թրամփը կարծում է, որ Բոլթոնը եկամուտ չի ստանա իր հուշերի հրատարակումից

ԱՄՆ նախագահ Դոնալդ Թրամփը կարծում է, որ ազգային անվտանգության հարցերով իր նախկին օգնական Ջոն Բոլթոնը, ամենայն հավանականությամբ, որեւէ եկամուտ չի ստանա գրքի հրատարակումից: Այս մասին ԱՄՆ նախագահն ասել է CBN-ի լրագրողներին տված հարցազրույցում, փոխանցում է ՏԱՍՍ-ը:

Թրամփը հիշեցրել է, որ Կոլումբիայի մայրաքաղաքային շրջանի դաշնային դատարանն ավելի վաղ որոշում էր կայացրել, որ Բոլթոնն իր «Սենյակը, որտեղ դա տեղի է ունեցել. Սպիտակ տան հուշերը» գրքով «վտանգել է ԱՄՆ-ի ազգային անվտանգությունը»: Գիրքը լույս է տեսնելու երեքշաբթի: Ըստ ԱՄՆ վարչակազմի՝ այն գաղտնի տեղեկություններ է պարունակում: «Կարծում եմ, որ Բոլթոնը մեծ խնդիր ունի: Բացի այդ, նա չի կարողանա գումարները պահել: Չեմ կարծում, որ որեւէ հնարավորություն կա, որ նա կարողանապահել գումարները,- ասել է Թրամփը:

Սպիտակ տան խոսնակ Քեյլի Մաքինենին ավելի վաղ հայտարարել էր, որ ԱՄՆ վարչակազմը մտադիր է հասնել նրան, որպեսզի Բոլթոնը չկարողանա եկամուտ ստանալ հուշերի վաճառքից: Ըստ նրա՝ դատարանը չի արգելափակել գրքի հրատարակումը բացառապես այն պատճառով, որ դրա պատճեններն արդեն բաժանվել էին, ուստի այդպիսի քայլն ուշացած էր:

Այս ամսվա սկզբին ԱՄՆ արդարադատության նախարարությունը դատի էր տվել Բոլթոնին նրա գրքի առաջիկա հրատարակման կապակցությամբ: ԱՄՆ իշխանությունները Բոլթոնին մեղադրում են պետական ​​գաղտնիք հանդիսացող տեղեկատվությունը չհրապարակելու պարտավորությունների խախտման համար, որոնք նա ստանձնել էր՝ դառնալով նախագահի խորհրդական: