Թրամփը Տոկիոյից պահանջել է ավելի քան չորս անգամ ավելացնել ԱՄՆ ռազմաբազաներին ուղղված ծախսերը. Բոլթոն

Անցյալ տարի Միացյալ Նահանգները Ճապոնիայից պահանջել են ամեն տարի 8 միլիարդական դոլար հատկացնել երկրում ամերիկյան ռազմաբազաների պահպանման համար՝ ավելի քան չորս անգամ ավել, քան հիմա է: Այս մասին երկուշաբթի հայտնել է Kyodo լրատվական գործակալությունը՝ վկայակոչելով Միացյալ Նահանգների նախագահի՝ ազգային անվտանգության հարցերով նախկին օգնական Ջոն Բոլթոնի՝ «Սենյակը, որտեղ դա տեղի է ունեցել. Սպիտակ տան հուշերը» (The Room Where It Happened: A White House Memoir) գիրքը: Kyodo-ն պնդում է, որ ունի այս գրքի տեքստը, փոխանցում է ՏԱՍՍ-ը:

Բոլթոնն իր հուշերում նշել է, հայտնում է գործակալությունը, որ նախագահ Դոնալդ Թրամփի հրամանով այդ պահանջը Ճապոնիայի ղեկավարությանը փոխանցել է անցյալ տարվա հուլիսին Տոկիո կատարած այցի ժամանակ: Գրքում նշվում է, որ Թրամփն իր օգնականին հրամայել է սպառնալ Ճապոնիայից ամերիկյան զորքերի լիակատար դուրսբերմամբ, եթե այն հրաժարվի ավելացնել բազաների համար ծախսերը:

Ճապոնիայի կառավարությունը մինչ օրս պաշտոնապես հերքում է լուրերն այն մասին, որ Վաշինգտոնը պահանջում է իրենից կտրուկ մեծացնել հատկացումներն ԱՄՆ ռազմաբազաներին:

Բոլթոնն ազգային անվտանգության օգնականի պաշտոնից ազատվել էր անցյալ տարվա սեպտեմբերի սկզբին: Նրա հուշերը, որ միանգամայն անբարենպաստ գնահատականներ են պարունակում, պետք է լույս տեսնեին մարտին, սակայն ավելի ուշ գրքի թողարկումը հետաձգվեց մինչեւ մայիս:

Ապրիլի վերջին հայտնի էր դարձել, որ գիրքը լույս է տեսնելու հունիսի 23-ին: Simon and Schuster հրատարակչատունն անցած ուրբաթ հրապարակել էր գրքի նախաբանը, որի համաձայն՝ Բոլթոնը, մասնավորապես, Սպիտակ տան ղեկավարի մոտեցումն արտաքին քաղաքականությանը համեմատում է անշարժ գույքի գործարքների հետ, ինչն ԱՄՆ դիրքերի թուլացման է հանգեցնում: