«Ժառանգությունը» ՀԱԿ-ը, ԲՀԿ-ն և ՀՅԴ-ն պահանջում են Տիգրան Առաքելյանին ազատ արձակել

Ոչ իշխանական խմբակցությունների ներկայացուցիչները («Ժառանգություն», ՀԱԿ, ԲՀԿ, ՀՅԴ) հայտարարություն են տարածել, որով միջնորդում են դատարանին՝ ազատ արձակել ՀԱԿ ակտիվիստ Տիգրան Առաքելյանին:

Նրանց տարածած հայտարարության մեջ, մասնավորապես, ասված է. 

«Եվրոպայի խորհրդի խորհրդարանական վեհաժողովը 2012 թվականի հոկտեմբերի 3-ին իր թիվ 1900 բանաձևում ամրագրել է մարդուն քաղաքական բանտարկյալ համարելու չափորոշիչները: Բանաձևի 5-րդ կետն ուղղված է ԵԽ անդամ պետությունենրին, ուր ասվում է ' «Վեհաժողովը ԵԽ անդամ բոլոր պետությունների իրավասու իշխանություններին կոչ է անում վերոհիշյալ չափանիշներին համապատասխան վերագնահատել քաղաքական բանտարկյալ դիտվող անձանց գործերը և ազատել նման բանտարկյալներին, կամ' պատշաճորեն վերաքննել նրանց գործերը»:

Համաձայն Հայաստանյան եւ միջազգային իրավապաշտպան կազմակերպությունների գնահատականների, Տիգրան Առաքելյանի գործը մի քանի չափորոշիչներով համապատասխանում է ԵԽԽՎ-ի կողմից ընդունված սահմանմանը: Տիգրան Առաքելյանի խնդրին անդրադարձ եղել թե՛ ԵԽ նախարարների կոմիտեյի շրջանառվող, թե' ԱՄՆ պետքարտուղարության' Մարդու իրավունքների 2012 թվականի զեկույցում, ինչը վնասում է Հայաստանի միջազգայն հեղինակությանն ու ժողովրդավարական վարկին:

Ուստի, կոչ ենք անում Հայաստանի իշխանություններին' վերոնշյալ բանաձևի ոգուն և տարրին համապատասխան քայլեր ձեռնարկել Տիգրան Առաքելյանին անհապաղ ազատ արձակելու համար, ինչպես նաեւ'վերացնել նույն գործով անցնող ակտիվիստների ազատազրկման սպառնալիքը»:

«Բարգավաճ Հայաստան» խմբակցությունից' Նաիրա Զոհրաբյան

«Ժառանգություն» խմբակցությունից' Ռուբիկ Հակոբյան

«Հայ ազգային Կոնգրես» խմբակցությունից' Լեւոն Զուրաբյան

ՀՅԴ-ից' Արմեն Ռուստամյան»