ԱՄՆ-ում ցուցարարները համադաշնակիցներին նվիրված ևս մեկ հուշարձան են քանդել Ռիչմոնդում

ԱՄՆ Վիրջինիա նահանգի Ռիչմոնդ քաղաքում ցուցարարները քանդել են Քաղաքացիական պատերազմի տարիներին համադաշնակցության հրետանային ստորաբաժանմանը նվիրված 1892 թվականին տեղադրված հուշարձանը, հայտնում է «ՌԻԱ Նովոստի»-ն՝ վկայակոչելով Washington Post-ը:

Տեղական ժամանակով երեկոյան ժամը 11-ին, ինչպես նշում է պարբերականը, ցուցարարները բարձրացել են Քաղաքացիական պատերազմի տարիների հրետանավորին պատկերող հուշարձանի վրա եւ ցած են նետել այն պատվանդանից: Այն համդաշնակիցների երրորդ հուշարձանն է դարձել, որը քանդվել է ցուցարարների կողմից Ռիչմոնդում բողոքի ցույցերի սկսվելուց հետո, որը Հարավի մայրաքաղաքն է եղել:

Ավելի վաղ ցուցարարները քանդել էին Ամերիկայի համադաշակցային նահանգների նախագահ Ջեֆերսոն Դեւիսի եւ Համադաշնակցության գեներալ Ուիլյամս Քարթեր Ուիքմանի հուշարձանը: Բացի այդ, ցուցարարները հանել էին նաեւ Քրիստոփոր Կոլումբոսի հուշարձանը եւ նետել էին այն լճի մեջ:

Միացյալ Նահանգներում քաղաքացիական պատերազմի տարիների հարավցիների հուշարձանների տարերային ապականումը սկսվել էր ոստիկանների ձեռքից աֆրոամերիկացի Ջորջ Ֆլոյդի մահից հետո բռնկված ցույցերի ֆոնին: Այն տարածվել էր նաեւ Ամերիկայի հայտնաբերող Քրիստոփոր Կոլումբոսի արձանների վրա, որոնց ձախ ակտիվիստները մեղադրում են Ամերիկայի բնիկ բնակչության ցեղասպանության մեջ:

1861-1865 թվականների Հյուսիսի եւ Հարավի միջեւ հակամարտության ընթացքում որոշ պետություններ անջատվել էին Միացյալ Նահանգներից եւ Ամերիկայի Կոնֆեդերատիվ նահանգներ էին կազմել: Ռազմական բախումն ավարտվել էր Հյուսիսի հաղթանակով եւ նախկին սահմաններով Միացյալ Նահանգների վերականգնմամբ: Ազատվել էին նաեւ ստրուկները, չնայած աֆրոամերիկացիների վիճակը շատ պետություններում դե ֆակտո անհավասար էր մնում մինչեւ 1960 թվականները: