Սոֆի Մխեյանը` ԱՄՆ-ում, Շվեդիայում, Փարիզում սպասվող համերգների և առաջիկա անակնկալների մասին

Երգչուհի Սոֆի Մխեյանը սեպտեմբեր և հոկտեմբեր ամիսներին շրջագայությունների մի ամբողջ շարան է պլանավորում: Այս մասին երգչուհին պատմեց ArmStar.am-ի հետ զրույցում:

«Սեպտեմբեր և հոկտեմբեր ամիսներին պլանավորում եմ մեկնել Շվեդիա' Ստոկհոլմ, համերգների: Այս ամիսների ընթացքում մեկնելու եմ նաև Լոս Անջելես, որտեղ լինելու եմ Հանրային հեռուստաընկերության «Երգ երգոց» նախագծի հետ միասին: Յուրաքանչյուր քաղաքում ունենալու եմ ընդամենը մեկ համերգ: Արդեն ամեն բան պլանավորված է: Ստոկհոլմում պլանավորում եմ լինել սեպտեմբերի 21-ին' Անկախության տոնին: Համերգային ծրագիրն էլ կարելի է կապել հայության հետ, անկախության հետ»:

Կայքըը հետաքրքրվեց նաև, թե պրեմիերաներ ու անակնկալներ լինելու են այդ համեգների ժամանակ. «Պրեմիերաներ չեն լինելու: Ինքս առաջին անգամ եմ լինելու Շվեդիայում: Իմ երգերն այնտեղ նոր են հնչելու»:

Սոֆին կայքի հետ զրույցում ասաց նաև, որ իր հետ են լինելու միայն ադմինիստրատիվ աշխատանքներով զբաղվող մարդիկ, մշտական ուղեկից, որպես այդպիսին, շրջագայություններ ժամանակ չի ունենալու:

«Բացի այս շրջագայությունից, այս տարի ավարտելով «Հայաստանի ձայնը» առաջին նախագիծը որպես մարզիչ, ի ուրախություն ինձ, շատ շրջագայել եմ դրսում, շատ հրավերներ եմ ունեցել: Օրինակ' Ռուսաստանի Դաշնության 13 քաղաքներում համերգներ եմ ունեցել: Հետո եղել եմ Բելգիայում, որտեղ մասնակցել եմ Արցախին նվիրված բարեգործական համերգին: Հետո մեկնել եմ Մոսկվա: Եղել են իհարկե քաղաքներ, որտեղ համերգներ չեմ ունեցել, բայց ես հասցրել եմ այնտեղ լինել' օրինակ Ռիգան, այնուհետև մեկնել եմ նաև Իսպանիա: Տարին գրեթե վերջանում է, բայց իմ ստեղծագործական աշխատանքներն ու պլանավորվող համեգները չեն վերջանում»,- ուրախությամբ նշեց Սոֆին:

Բացի արդեն հաստատված շրջագայությունների շարքից' երգչուհին առաջիկայում համերգների հրավերներ ունի նաև Եվրոպայում. «Փարիզում համերգ ունենալու առաջարկ եմ ստացել, սակայն սրա մասին դեռ խոսելը վաղ է: Նախընտրում եմ խոսել արդեն իսկ հաստատված բաների մասին»,- ավելացրեց երգչուհին: Ինչ վերաբերում է Հայաստանի երկրպագուներին, ապա Սոֆին առավել ուշադիր է նրանց նկատմամբ. «Այստեղ տարբեր տոների և առիթների կապակցությամբ կազմակերպվում են համերգներ, որոնց սիրով մասնակցում եմ, եթե երկրում եմ լինում: Օրինակ վերջերս մասնակցեցի Արտակարգ իրավիճակների նախարարության համերգին, քաղաքապետարանի կողմից կազմակերպված օգոստոսի 31-ի համերգին Կարապի լճում»:

Բացի նշված համերգային ծրագրերից Սոֆին ապագայի հետ կապված շատ հետաքրքիր գաղափարներ ու պլաններ ունի: Դրանց մասին, սակայն, երգչուհին առայժմ լռում է:«Թող որ անակնկալ լինի: Կխոսենք երբ ժամանակը գա»,- ավելացրեց երգչուհի Սոֆի Մխեյանը: Խոսակցության վերջում Սոֆին ավելացրեց նաև, որ իր առաջիկա պլանների, ստեղծագործական տարբեր նորություններին բոլորը կարող են ծանոթանալ' հետևելով իր ֆեյսբուքյան պաշտոնական էջին, որտեղ կզետեղվի նաև ArmStar.am-ի այս նյութը, ինչպես նաև լուսանկարներ սպասվող համերգներից: