Թրամփը մտադիր չէ վերանայել ԱՀԿ-ից ԱՄՆ-ի դուրս գալու որոշումը

ԱՄՆ նախագահ Դոնալդ Թրամփը չի նախատեսում վերանայել Առողջապահության համաշխարհային կազմակերպության կազմից ԱՄՆ-ի դուրս գալու մասին իր որոշումը: ԱՄՆ վարչակազմի ղեկավարը սա հաստատել է՝ Սպիտակ տանը պատասխանելով լրագրողների հարցերին, փոխանցում է ՏԱՍՍ-ը:

«ԱՀԿ-ն ամբողջ աշխարհին մեծ հիասթափություն պատճառեց: Երկար տարիներ շարունակ, ինչպես գիտեք, մենք շատ ավելին ենք վճարել, քան որեւէ մեկ ուրիշը: Իսկ նրանք Չինաստանի խամաճիկն էին: Այնպես որ, ոչ, ես չեմ վերանայում [այդ որոշումը], եթե միայն նրանք (ԱՀԿ պաշտոնյաները) իրենց մոտ կարգուկանոն չհաստատեն: Բայց ես վստահ չեմ, որ այս փուլում նրանք դրան ընդունակ են: Ցավոք, հնարավոր է միայն տարիներ հետո կարողանան դա անել, բայց ԱՀԿ գործիմացությունը աղետալի էր»,- շեշտել է Թրամփը: Նրան խնդրել էին հստակեցնել՝ հնարավո՞ր է, որ հրաժարվի ԱՀԿ կազմից ԱՄՆ-ի դուրս գալու որոշումից՝ կապված այդ կապակցությամբ ամերկացի մի շարք օրենսդիրների կոչերի հետ:

Մայիսի 29-ին Թրամփը հայտարարել էր, որ Վաշինգտոնը մտադիր է ամբողջությամբ դադարեցնել ԱՀԿ-ի հետ հարաբերությունները, քանի որ նրա ղեկավարությունը հրաժարվել է վերափոխումներ կատարելուց, ինչը պնդում է ԱՄՆ վարչակազմը: Ընդ որում՝ ԱՄՆ առաջնորդը հերթական անգամ ԱՀԿ-ին մեղադրել էր Չինաստանի լիակատար վերահսկողության տակ հայտնվելու մեջ: ԱՄՆ նախագահի վարկածով՝ Չինաստանի իշխանությունները եւ ԱՀԿ ղեկավարությունը անհրաժեշտ միջոցներ չեն ձեռնարկել նոր կորոնավիրուսի տարածման հետ կապված:

Թրամփը մայիսի 18-ին Twitter-ի իր էջում նամակ էր հրապարակել, որն ուղարկել էր ԱՀԿ գլխավոր տնօրեն Թեդրոս Գեբրեյեսուսին: Նամակում նշվում էր, որ ԱՄՆ-ն պատրաստ է կազմակերպությանը 30 օր տրամադրել՝ բարեփոխումների անցկացումը երաշխավորելու համար: Մասնավորապես նշվում էր, որ ԱՀԿ-ն պետք է հեռու մնա Չինաստանի իշխանություններից: Վաշինգտոնը նախազգուշացրել էր, որ հակառակ դեպքում կդադարեցնի ԱՀԿ ֆինանսավորումը եւ կվերանայի կազմակերպությանն իր անդամակցությունը: