2019 թվականին 184 անպտուղ զույգ բուժօգնություն է ստացել պետական ծրագրի շրջանակում․ նախարար

2019 թվականին 184 անպտուղ զույգ Հայաստանում բուժօգնություն է ստացել անպտղության անվճար կամ արտոնությամբ բուժման պետական ծրագրի շրջանակում։ Այս մասին հայտնեց առողջապահության նախարար Արսեն Թորոսյանը ՀՀ ԱԺ առողջապահության և սոցիալական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում քննարկման ժամանակ։

Նրա խոսքով՝ 2019 թվականին անպտուղ զույգերի համար վերարտադրողական օժանդակ տեխնոլոգիաների կիրառմամբ բժշկական օգնության ծառայությունների ծախսերը կազմել են 138․1 մլն դրամ՝ նախատեսվածի 72․7 տոկոսը, պայմանավորված նրանով, որ ծրագիրը սկսել է գործել սեպտեմբերից՝ մինչ այդ տեղի ունեցող իրավական կարգավորումների պատճառով։

Ծրագրի շրջանակում պետության կողմից երաշխավորված անվճար բուժօգնության եւ սպասարկման շրջանակում իրականացվել է 3267 հետազոտություն՝ բյուջեով նախատեսված 4824-ի դիմաց, բուժօգնություն է մատուցվել 184 զույգի՝ բյուջեով նախատեսված 276-ի դիմաց։

Հիշեցնենք, որ անպտղության անվճար կամ արտոնությամբ բուժման նոր ծրագրի բյուջեն, որի շրջանակում մի քանի հարյուր զույգ օժանդակ վերարտադրողական տեխնոլոգիաներին հասանելիություն կստանա, ընթացիկ տարում կկազմի 210 մլն դրամ: Ծրագիրը ուժի մեջ է մտել սեպտեմբերի 7-ից։

Հիշեցնենք նաեւ, որ այսօրվա դրությամբ Հայաստանում առաջնային անպտղությամբ նվազագույնը 20 հազար զույգ կա՝ բոլոր զույգերի մոտ 14,8 տոկոսը։