Կառավարության անդամների համատարած թեստավորում չի անցկացվել․ Մանե Գևորգյան

Կառավարությունում կորոնավիրուսի հաստատված այլ դեպքեր չկան։ Այս մասին այսօր՝ հունիսի 1-ին, հայտարարել է վարչապետ Նիկոլ Փաշինյանի մամուլի խոսնակ Մանե Գևորգյանը։

«Կառավարության անդամների համատարած թեստավորում չի անցկացվել, քանի որ բոլոր նրանք, ովքեր անմիջական շփում են ունեցել վարչապետի հետ, պահպանել են անվտանգության բոլոր կանոնները՝ սոցիալական հեռավորություն, դիմակների և ձեռնոցների կրում։ Քանի որ չունենք ախտանիշներ այս պահին համատարած թեստավորման անհրաժեշտություն չկա։ Թեստավորումն իրականացվում է բժշկական ցուցումով, եւ եթե լինի, դուք դրա մասին կտեղեկանաք»,– ասել է նա։

Դիտարկմանը, որ վարչապետն էլ ուղիղ եթերում ասաց, որ ախտանիշներ չի ունեցել, բայց նրա մոտ հաստատվել է վիրուսը, Մանե Գևորգյանն արձագանքել է․ «Որովհետև ինքն անմիջական շփում է ունեցել վարակակրի հետ, դրա համար են իրեն թեստավորել, այո կա, որ ասիմպտոն են մարդիկ տանում, ու ըստ երեւույթին վարչապետի մոտ, որևէ սիմպտոմներ չկան»։

Մանե Գևորգյանի խոսքով՝ Արցախ ուղևորվելուց առաջ լրատվական բաժինն էլ էր թեստավորվել, այդ թվում եւ ինքը, բայց թեստի պատասխանը բացասական է եղել, 2 օրից կրկին կթեստավորվի․ «Ինձ դեռ չեն թեստավորել, վաղը կամ մյուս օրը նոր երեւի կթեստավորեն։ Իմ վերջին թեստը եղել է, երբ նախատեսում էինք Արցախ գնալ, թեստավորվել էի, և պատասխանը բացասական էր եղել, եթե չեմ սխալվում մայիսի 30-ին եմ թեստավորվել՝ շաբաթ օրը։ Լրատվական վարչությունն էր թեստավորվել, քանի որ էլի նկարահանումներ կային, վարչապետի հետ անմիջական շփում գոյություն ունի»։