Ամերիկան վերստին իրեն է վերադարձնում տիեզերքում առաջատարությունը. Մայքլ Փենս

Հաջորդ շաբաթը կմտնի ամերիկյան տիեզերագնացության պատմության մեջ՝ վերջին 10 տարում առաջին անգամ ամերիկյան տիեզերակայանից արձակվելու է ամերիկյան արտադրության հրթիռ՝ տիեզերագնացներին Երկրի ուղեծիր հասցնելու համար: Այս մասին Տիեզերական ազգային խորհրդի նիստում հայտարարել է ԱՄՆ փոխնախագահ Մայք Փենսը:

Խորհրդի նիստին, որը տեղի է ունեցել ՆԱՍԱ-ի կենտրոնակայանում, մասնակցել են նաեւ ՆԱՍԱ-ի ղեկավար Ջիմ Բրայդենսթայնը, Սպիտակ տան անդամներ, ինչես նաեւ Պենտագոնի ղեկավարությունը, այդ թվում՝ Շտաբների պետերի միացյալ կոմիտեի փոխնախագահ, գեներալ Ջոն Հայթենը, փոխանցում է «Ամերիկայի ձայնը»:

«Մեզ մեկ շաբաթ եւ մեկ օր են բաժանում այն պահից, երբ Ամերիկան ամերիկյան հրթիռներով ամերիկյան հողից ամերիկացի տիեզերագնացներին կվերադարձնի տիեզերք: Սա այս ծրագրի պատմության մեջ արտասովոր գրավիչ ժամանակ է»,- հայտարարել է Փենսը՝ Դոնալդ Թրամփի աշխատակազմի անունից շնորհակալություն հայտնելով ՆԱՍԱ-ի ամբողջ թիմին եւ հիացմունք տիեզերագնացների թիմով, որոնք «հաջորդ շաբաթ Ամերիկային կվերադարձնեն տիեզերքում առաջատարությունը»:

«Ես կցանկանայի ձեզ բոլորիդ ուղղակի շնորհակալություն հայտնել: Սա ապշեցուցիչ է, բայց կարճ ժամանակում...Ամերիկան վերստին իրեն է վերադարձնում տիեզերքում առաջատարությունը: Տիեզերական զորքեր ստեղծելու միջոցով մենք կապահովենք մեր երկրի անվտանգությունը: Ամերիկյան հրթիռներով ամերիկացի տիեզերագնացների վերադարձը...հաստատում է տիեզերքի անսահման տարածքներում առաջնորդության մեր ձգտումը ճիշտ այնպես, ինչպես Ամերիկան ազատ աշխարհում է առաջնորդ»,- շեշտել է ԱՄՆ փոխնախագահը:

Ջիմ Բրայդենսթայնը հաստատել է, որ ԱՄՆ-ն վերադառնում է Լուսին: «Մենք հետեւում ենք տիեզերական քաղաքականության մասին նախագահական №1 հրահանգին: Ինչպես եւ Դուք հայտարարել էիք ավելի քան մեկ տարի առաջ, մենք պատրաստվում ենք Լուսնի հարավային բեւեռ մարդկանց ուղարկել 2024 թվականից ոչ ուշ»,- ասել է Բրայդենսթայնը՝ հավելելով, որ առաքելության կազմի մեջ կլինի նաեւ առաջին կին տիեզերագնացը, որը վայրէջք կկատարի Լուսնի վրա:

Բրայդենսթայնի խոսքով՝ ՆԱՍԱ-ն ավարտել է SLS (Space Launch System – Տիեզերական արձակումների համակարգ) գերծանր տանող հրթիռի մշակման հիմնական փուլը, որն օգտագործվելու է դեպի Լուսին օդաչուավոր տիեզերական արշավախմբերի համար: Հիմա տիեզերանավը հավաքվում է Միսիսիպիի Սթենիսի Տիեզերական կենտրոնում, որի առաջին նախնական փորձարկումները տեղի են ունենալու արդեն այս ամռանը եւ աշնանը:

SLS-ն օգտագործվելու է «Օրիոն» օդաչուավոր տիեզերանավի արձակման համար, որը «Ապոլոն» տիեզերական ծրագրի իրականացման պահից ի վեր երկար ժամանակ հետո առաջին անգամ թռչելու Լուսնի շուրջ ուղեծրով:

Ծրագրի իրականացմանը մասնակցում են նաեւ տիեզերքի յուրացման գործում ԱՄՆ գործընկերները՝ Ճապոնիայի, Եվրոպական միության եւ Կանադայի տիեզերական գործակալությունները:

Crew Dragon օդաչուավոր տիեզերանավը մայիսի 27-ին արձակվելու է «Ֆալկոն-9» հրթիռի միջոցով Քենեդի տիեզերական կենտրոնի տիեզերակայանից՝ ՄՏԿ հասցնելով ամերիկացի տիեզերագանցներ Բոբ Բենքենին եւ Դագ Հյորլիին: