Թրամփը մեկ ամսում ռեկորդային քանակի նվիրատվություն է հավաքել

ԱՄՆ նախագահ Դոնալդ Թրամփն ապրիլին 61.7 միլիոն դոլար նվիրատվություն է հավաքել նոյեմբերին նախատեսված ընտրություններին երկրորդ ժամկետով պետության ղեկավարի պաշտոնում վերընտրվելու համար: Դեմոկրատական կուսակցությունից ԱՄՆ նախագահի թեկնածու, ԱՄՆ նախկին փոխնախագահ Ջոզեֆ Բայդենը ապրիլին նախընտրական քարոզարշավի ընթացքում 60.5 միլիոն դոլար է հավաքել: Այս մասին հայտնում են հանրապետականի եւ դեմոկրատի ընտրական շտաբներից, փոխանցում է ՏԱՍՍ-ը:

«Հանրապետական կուսակցության ազգային կոմիտեն այսօր հայտարարել է, որ Դոնալդ Թրամփի եւ ՀԿԱԿ-ի համատեղ կոմիտեներն ապրիլին 61.7 միլիոն դոլար են հավաքել, ինչը ռեկորդային ցուցանիշ է մեկ ամսվա համար»,- նշվում է Թրամփի նախընտրական շտաբի տարածած հաղորդագրության մեջ: Նրա նախընտրական քարոզչարշավի համար նվիրատվությունների ընդհանուր ծավալը հասել է 742 միլիոն դոլարի, որից ավելի քան 255 միլիոն դոլարը դեռ չի ծախսվել:

Բայդենի շտաբը տեղեկացրել է, որ անցած ամիս նախկին փոխնախագահի ընտրության համար նվիրատվությունները 60.5 միլիոն դոլար են կազմել, իսկ մարտին այդ ցուցանիշը մոտ 79 միլիոն դոլար էր կազմում: