Նիկոլ Փաշինյանը կադրային քաղաքականության հարցում գերազանցում է Սերժ Սարգսյանին. Ով կզբաղեցնի Էրիկ Գրիգորյանի տեղը. «Հրապարակ»

«Հրապարակ» թերթը գրում է. «Նիկոլ Փաշինյանը կադրային քաղաքականության հարցում գերազանցում է Սերժ Սարգսյանին, մեկ օրում մի անձը մի քանի պաշտոնի է նշանակվում, և որևէ հիմնավորում չի տրվում, թե որ պաշտոնյան ինչու է ազատվում զբաղեցրած պաշտոնից:

Նախօրեին հայտնի դարձավ, որ շրջակա միջավայրի նախարար Էրիկ Գրիգորյանն ազատվել է պաշտոնից, վարչապետի խոսնակը հայտնեց՝ «սեփական դիմումի համաձայն», մինչդեռ երեկ Նիկոլ Փաշինյանը նախ գովեստի ու շնորհակալության խոսքեր ասաց Գրիգորյանի հասցեին, ապա նրա ազատվելու պատճառների մասին հարցին պատասխանելիս ակնարկներ արեց. «Համոզված եմ, որ այս ընթացքում նա արել է առավելագույնը` առավելագույն արդյունքների հասնելու համար, բայց աշխատանքը բարդ երևույթ է, գալիս են փուլեր, ժամանակներ, երբ անհրաժեշտ է լինում կայացնել որոշումներ, և կայացվել են որոշումներ»։

Նախարարությունում խոսում են, որ Գրիգորյանի ազատման հիմնական պատճառը «նախկին» լինելն է, որով Փաշինյանը մեսիջ է փորձում հղել: Տեղեկություններ կան, որ նախարարի պաշտոնում նշանակվելու է վերջերս նախարարի առաջին տեղակալ նշանակված Վահե Ջիլավյանը, ով 2018-ից մինչև 2020-ի ապրիլը եղել է նախարարության գլխավոր քարտուղարի պաշտոնակատարը, իսկ ապրիլի 21-ից մինչև մայիսի 6-ը՝ նախարարի առաջին տեղակալը»:

Առավել մանրամասն՝ թերթի այսօրվա համարում: